Malie – Ultime batude

Lant sù pes scjalis, te cjase che e je come glotude di un scuriç e di un cidin plens di polvar, un cidin no di chest mont, al è come se o sintès il pês dai cuarps dai oms e feminis de famee, za disfantâts e lâts in nuie, che cu la lôr cjarie di vitis vivudis a plen o dome par un toc, a sburtin su la mê schene.

Forsit al è chest il motîf parcè che o sint un sgrisul che si slargje des spalis jù fin tai ombui, come la sensazion di poiâsi intor dal toc in ombrene de murae di un broili plen di ciespârs cu lis fueis scuris, intun dopomisdì di Istât: un istant di vite che ti dismôf la piel incuchide pe canicule.

Rivade disore, o cjati dôs feminis in neri, agnis forsit, sentadis sul casson di rôl intaiât cu lis gjambis tornidis a çate di leon. Il gno vistît al à di jessi cussì curt, e forsit tenzût cuntun colôr cussì penç, che movintsi al lasse tal aiar une strisse tacadice e i voi des dôs feminis a restin picjâts tra l’ôr de cotule e il cuel dal pît.

O cîr la cjamare dal muart lant daûr di un sun. Un businôr, mo stuf, mo gnervôs, di un furmiâr uman.

O traviersi il coridôr cui voi che, scomençant a usâsi al scûr, a ricognossin lis sacumis di cjandelîrs, curnîs e tendons. Il cûr mi poche tes orelis, o soi daûr a montâ suntun palc. O devi cirî il respîr che mi mancje intun aiar penç come intun teatri, ma cuntun odôr diferent: di canfore, sudôr, gorgadis acidis; bocjis che di oris no viodin un got di aghe; di sanmartinis sflapidis e cere disfate. I odôrs de muart a son i odôrs che i vîfs a doprin par involuçâ la muart.

O poi la man su la mantie de puarte, il metal al è cussì frêt che mi bruse la piel. Il businôr aromai al è deventât insopuartabil, i rumôrs de citât moderne che e cres, acelere, si alce, no son nuie in confront.

Cuant che o jentri, lis breis dal paviment a ciulin. Il Crist di un cuadri a vueli picjât su la parêt dongje dal barcon mi cjale, i miei voi a incrosin i siei e no si movin. Ducj a tasin. A spietin la mê prime batude, a spietin che al scomenci il spetacul.

Un, doi, trê.

L’aiar al vibre. I miei vistîts a vibrin, o la stole di bolp che e torne a vivi e e vûl saltâ jù des mês spalis, cjapâ la puarte e scjampâ vie. Il gno cuarp al vibre, o stoi par colâ par tiere.

Un, doi, trê.

Cumò che o soi jentrade, il gno public al varès za tacât a batimi lis mans, ma chescj voi no son ca par adorâmi. O sint dutis lis vogladis che mi rosein i braçs e lis gjambis, sbregant vie tocs di cjar, strichis di piel, sclesis di vues. Cheste cjamare e je un tribunâl e a chest tribunâl cumò o ai di dâi cont.

O sbassi il cjâf par saludâ. Denant di me, distirât sul vilût neri, al è il cuarp di un om in divise. Lis mans incrosadis sul pet a strenzin une corone dal rosari cui grans di len rossit. Di une bande e di chê altre a balin lis flamis di cuatri cjandelis intortoladis. I voi di veri de mê bolp si spieglin tal seglotut di arint da pît dal cadavar.

Par cheste int, jo no soi la fie di un om muart rivade masse tart: o soi il truc che mi tapone la muse, i cines che o ai zirât, la vite lontane intune citât, i Nadâi cence di me intune cjase dal Friûl sblancjât de zulugne e petenât de buere; o soi chel pari che prime di murî nol à nancje podût viodi pe ultime volte chê frute, o soi il sucès che ca al devente condane parcè che mi à fat dismenteâ i miei dovês di femine, di fie, di cristiane. Ma cheste int no dismentee e no perdone.

Vuê o voi in sene dome par chest om che nol pues ni viodimi ni scoltâmi e mi tocje di recitâ une part che lui, il regjist, no mi à mai insegnât: vuê o soi sô fie e o devi vaîlu. Forsit o pues cjatâ lis emozions che mi coventin sgarfant dentri di me?

Un, doi, trê.

Il public al spiete. La cineprese e à za tacât cul so sunsûr regolâr che mi vise chel di une ruede di biciclete che e zire a vueit. Ma jo o soi buine dome di cjalâ chel cuarp cirint une batude che no mi vignarà mai iniments.

di Eline
#1630