Malie – Cine

Cemût soio deventade atore? Cjalâsi indaûr cumò al è come cori par un coridôr cu lis parêts plenis di fotografiis, cuadris, statuis, ogjets ingrumâts di ogni fate, voltant il cjâf di une bande e di chê altre. Lis musis, i lûcs, i incuintris a deventin maglis fûr di fûc, e i colôrs a parin mo smavîts, mo vîfs e maraveôs, e tes orelis al è dut un cisicâ, un bisibili, come l’aiar cuant che tu sês suntune barcje che e sbrisse su la lagune di Vignesie. I teatris, lis primis parts… o ai vût sucès – no fevelarès di fortune. La cariere me soi vuadagnade lavorant e muardint come une lipare. O savevi ce che o volevi. Lu ai simpri savût, de prime volte che o ai poiât il pît sui scjalins par lâ sù sul palc di Sium di une gnot di mieze Istât, vistude di fade, cuntune tuniche lizere che e svoletave tal aiar cjalt dentri dal teatri, umit dal respîr di centenârs di personis, e une corone di elare che mi zirave ator dal cjâf, poiade sui miei cjavei riçots.
In chê volte no pensavi al cine. Sì, di fantate, tes fughis de mufe e dal flât pestifar dai insegnants dal coleç, o jeri stade te sale che a vevin metût sù doi impresaris in centri. Tal scûr dal cine, tal fum che al butave sù celestin denant dal proietôr, roseant i caramei che doi vendidôrs a ufrivin zirant pal public, i voi mi lagrimavin, e no savevi se pal odôr fuart dai spagnolets e dai zigars…
Gno pari al veve viodût i prins cines dai fradis Lumière, cuant che cualchidun ju veve puartâts pe prime volte a Udin e ancje ca i trens a vevin tacât a sfondrâ lis parêts e i operaris a vignî fûr di un porton che la lûs e dissegnave sul blanc di cjalcine di un mûr là che prime nol jere nuie.
Par agns, il gno mont al è stât il teatri, e jo o ’nt vevi cerçât ancjemò cussì pôc che o brusavi di curiositât e no mi passave pal cjâf nancje par insium di bandonâlu. O cjalavi il cine di lontan, incantesemade e spauride, come che in prin o cjalavi lis atoris e i atôrs za famôs che a recitavin dongje di me sul palc: int che e zirave l’Italie, e viodeve citâts, e fevelave par francês, e jere stade a Parîs… jo, che a cjase mi sintivi scjafoiade dal spazi strent dal Friûl, o fevelavi par talian butant dentri chês cuatri peraulis di francês imparadis tal coleç, par distacâmi di dute chê int che o vevi ator e che e jere buine di doprâ ben dome il so lengaç di contadins; jo, che mi sintivi di jessi fate par un grant destin e pal sflandôr dai zîrs dai siôrs, rivade fûr dal Friûl o vevi scuviert di jessi dome une fantate provinciâl, che il gno talian al jere sporc come lis stradis dal gno paîs dopo dai sglavins che a vegnin jù di colp e lis lassin puntinadis di pocis e impastadis di pantan.
Il cine al jere robe di pionîrs, aventurîrs, il fiastri dal teatri che se nol jere ribel pal lengaç, al jere ribel pe tecniche: il cine al jere lûs, moviment, dut ce che pai agns sflandorôs e gaiarins dai prins dal secul al jere moderni. O vignivi fûr di un mont di tiere, aghe, piere, fûc, cinise, cîi grancj, frêts e masse lontans, buere che e secjave la piel, un mont lent e scûr come il fonts infrusignât di un cjaldîr di ram, e di une dì in chê altre mi slontanavi di lui. O crôt che il cine al sei stât la fin di un viaç che mi puartave vie, simpri plui lontan, des lidrîs.
Par rivâ intun apartament al prin plan di un palaç tal centri di Turin: mi visi il soreli che al zuiave cu la trombe dorade di un gramofon, une tace di vermouth poiade suntun taulin, e un regjist in vieste di cjamare sentât cu lis gjambis in crôs tal cjanton di un tapêt persian a rosis. Fûr, Zenâr, nêf e lis sglinghinadis dai trams – dentri, jo che o lei la prime pagjine di un copion. Cussì al è scomençât dut.

di Eline
#1629

1 comment