Zaraton a San Zuan al Nadison – La croniche

Ve ca, che no si sin dismenteâts di scrivi la croniche di un dai spetacui di chest 2024 vignûts plui ben.

Eh, sì, parcè che e je vere che Zaraton, il libri dal Ostîr publicât de Kappa Vu intal Avrîl dal 2023 nol è un libri de nestre Ostarie, ma aromai, un libri soversîf, simbolic e dirompent come chest, nol podeve no vignî adotât di ducj Chei di Contecurte.

E il spetacul scrit dal Ostîr, che lu presente in maniere origjinâl e plene di snait, al rive a tignî bot ancje cuant che no sin in tancj in vore. Si che duncje, a San Zuan al Nadison, ai 4 di Avrîl, propit un an daspò de jessude de opare, o sin rivâts a un prodot senic che nus è parût pardabon taront. E chest, ancje in gracie de preparazion de senografie prontade… Eh, sì, nol pareve vêr rivâ e cjatâ pront mic, mixer, proietôr, taulins e dut ce che al covente par meti adun il spetacul. Incredibil!

Che aromai, cui che lu à viodût al sa ben, al tire dongje sì il test dal libri, ma ancje lis imagjins dal fumut di Laurinç Marangon e Giulia Stirpe, vincidôr dal San Simon 23 par fumuts, e une colone sonore musicâl, e une television, dulà che si messedin une vore di lenghis, di chenti e dal forest. In sumis… Zaraton, cuant che al decît di lâ ator di cualchi bande, al fâs la sô figure purcite. Anzit… zaratoniche.

Ma vie, intant che us mostrìn un pocjis di fotografiis… pûr trop robadis a chei de Biblioteche (grassie!), stant che il nestri Muini al jere impegnât a lei par spagnôl e par bisiac, e di prionte ancje a fâ il mezzobusto pal telegjornâl, us contin ancje altri.

Us contin par esempli che o vin vût pardabon un biel benvignût dal Sindic, cun regâi e peraulis di stime, e la comunicazion che il paîs sielzût pai festegjaments de Patrie intal 2026 al è nuiemancul che San Zuan al Nadison. (e nô si sin za prenotâts par un spetacul, clare!). E us contin ancje che duta la int che e jere a viodi, nus è someât, e je stade une vore atente e contente dal spetacul. E di chest o vin simpri gust.

Podopo, di bon che o vin tacât une vore tart, stant che la Sartore, aromai par cjatâle al è piês che cirî une gusele intal Nadison (eh, sì, inte paie magari ancje tu la cjatis) e difati e je rivade tipo mieze ore in ritart (par jessi bogns), juste juste par metisi a lei il so toc. Mighe come il nestri Famei, che i son bastadis dôs peraulis e schene a schene al à imbastît lis leturis insiemi al Ostîr, dentri dal hoola-hop portâl dai multiviers! Robononis!

Ce altri… ah, sì. Ancje se nissun si è inacuarzût di nuie, lis imagjinis daûr des schenis, cul fumut e i dissens, e il rest, a son ladis indevant perfetis, cence nancje un intop, e compagn lis musichis dilunc des leturis… eh… al vûl dî meti une gjatemarangule a la part tecniche!

In sumis… Ostîr content, Giuliano de Kvu contente, assesore contente, chei di Contecurte contents, Chei de biblioteche contents, public contenton… Dome Zaraton no savin ce che al pense… lu vin lassât là, pierdût intal Mediterani… us tocje lei il libri par scuvierzi cemût che e va a finî la storie!

E se o volês viodi plui fotografiis e savent di plui, in curt o inzornarin ancje la pagjine in cjar e vues cun chest spetacul.