La Stagjon des Contis a Cjamin – la croniche

Cualchi volte, i spetacui, a vegnìn une vore ben ancje cuant che tu ju preparis pôc, se il clime al è zuiarin e pasât, cun dut che pront a jessi gjoldût. Al è propit ce che al è sucedût a Cjamin al Tiliment, dulà che o vin imparât une robe. Ma une robe impuartante, che nus servissarà di insegnament par ducj i timps da avignî e che o metarìn in vore ogni volte che si podarà. Cuale? Ma clare! L’aperitîf al à di sei fat prime di tacâ il spetacul, e no dopo!

Eh, sì. Al è cussì! E va benon la idee di no lassâsi come cjans, ma ancje no rivâ come cjans al è une robe di considerà. E sabide matine, ai 6 di Avrîl, intal cors de rassegne Divagazioni, metude adun in doi e doi cuatri dal Comun di Cjamin, la presentazion dal prin libri scrit di une Ostarie – La Stagjon des Contis – e je scomençade propit ben, cuntun tai e cuatri stuzighets.

E ancje se la int no jere tante, o sin sigûrs che e je stade une vore contente, si è fate cuatri ridadis, e e à scoltât ancje cualchi biele conte, sedi che a son dentri tal libri, sedi di chês che no jerin jentradis, ma che a jerin istès une vore bielis. Dal sigûr, la ore di matine, no nus à permetût di rivâ a tirâ dongje tancj de Ostarie, ma chei che a jerin – Ostîr, Famei, Muini, Sartorie e Gjatemarangule – a sin son rangjâts e a àn tignût alte la bandiere di Contecurte. (Bon, no vin une bandiere, ma o vin doprade chê dal Friûl).

Ma ve che us spiin alc de matinade (che l’Ostîr, creature dal scûr, al è lât indenant a clamâ “serade” par dut il timp). Il Checo, famei pren di snait, si è imponût su lis leturis e al à volût vierzi cu la sô “La zornade” e sierà cun “Mascaron angolan“, refudant cun dispresit una conte sperimentâl dal Ostîr, ispirade a la massarie, che però o vin decidût di no publicâ ma di lei inte serade dal 23 di Avrîl a Romans.

Dopo chest, o vin vût lis Ontecurtutis, che a son cetant sveltis che no lis capissin ducj, ma cuant che lis capissin… E il biel che ogni volte il misteriôs autôr che al cognòs dome il Peteçon de Ostarie nus mande cualchidune gnove. O sin rivâts a #47, e tal sorteç fat de int a son saltadis fûr ancje lis ultimis dôs, che al somee che a sedin plasudis une vore… Eh, par leilis o vês di spietâ e soredut seguînus su Instagram.

Podopo o vin let ancje la maluseriose e poetiche “Dutis lis rosis ch’a mi regalin” di Sandri Valop, che al zuiave in cjase, e The little drummer boy, di Laurin, tant par dà une vision diferente al Nadâl. Cence smenteâsi di chê altre che e zuiave in cjase, Astrid, che si è lete la sô “Il tesaur dal flum“, cun tan di finâl cambiât dal Ostîr… a sua insaputa.

Dut ca? Eh no… o vin vût ancje un moment une vore, ma une vore emozionant, cul Ostîr che al à let dôs poesiis che a àn lassât il public cence peraulis, ancje se lis à letis in te lôr lenghe origjinâl. Bernizagano e Christ a àn fat vignî il grop tal cuel a plui di cualchidun. O pensìn propit che o mantignarìn cheste part dal spetacul ancje tal prossim.

E vonde dai. E je lade ben e si sin divertûts. O vin contât storiis e sparniçât un pôc di furlan di osterie, plen di bago e astronâfs. Gjoldeisi cualchi fotografie fate de gjatemarangule robant la machine fotografiche al muini, lant a risi di un câs dipolomatic, stant che e coste plui di dute la Osterie metude insiemi.

2 comments