CC24Avrîl#23 – LÔR

Ducj ju clamavin LÔR. A vevin decidût bielzà dodis agns indaûr di bandonâ la civiltât e lâ a vivi intune serie di landris sore Glemone. LÔR a vevin svilupât in curt dut ce che i coventave par jessi une comunitât indipendente: a vevin segnât i trois di colegament framieç lis lôr abitazions primitivis, si jerin judâts a imparâ i rudiments de vite isolade, a cjaçâ, a pescjâ, a dicerni lis plantis buinis di chês tristis e ogni piçul truc par vivi al miôr chê realtât isolade.

LÔR a vevin cjapât chê decision par vie che no si sintivin plui a cjase a Udin, a Glemone, a Tumieç, no rivavin plui a capî cuâl ch’al jere il sens de lôr esistence tal mieç di chei altris. Nissune part, nissun sens, nissune utilitât, si sintivin fûr dal mont e cussì a son propit lâts fûr dal mont. A vevin parfin madurât la decision di clamâsi fra di lôr propit LÔR, tant che ju clamavin chei de “civiltât tradizionâl”.

Ma nuie al dure par simpri, i cambiaments a son ogni minût daûr dal cjanton.

La tiere e trime, i landris a son puescj sigûrs, no son lampadaris ch’a colin, no son armârs che ti rivin intor, no son rudinaçs che ti podin gjavâ la vite cence che nancje tu ti necuarzedis.

Ogni famee di LÔR e ven fûr dal propri landri. Tre, cuatri a la volte si radunin in chê che LÔR a clamin “la nestre place”. Ducj cidins, ducj ch’a cjalin in bas, viers Glemone.

In chel 6 di mai dal 1976 LÔR a an capît: al jere il moment di tornâ jù, di tornâ cun chei altris. Chel al jere il dì ch’a saressin tornâts ae civiltât, il moment ch’a varessin cjatât il lôr puest tal mont.