CC24Avrîl#21 – Jê, la mê ispiradore… e jo!

#21 – Jê, la mê ispiradore… e jo!

Jê… oh jê!
Jê, mi fâs vignî i cjavei grîsverts.
Tai prins timps di chest an no vevi mai vût un rapuart cun jê cussí stret tant che chel di cumô. Vuê mi fâs sintî un pôc strache.
O soi propit stufe di cirîle, di imbilisiâle, di coriji daûr par fâ amicizie cuntun teme.
Jê, e je tant che une scluse, o un portâl che si vierz tai monts vieris e ancje ta chei gnûfs par creâ aur.
Mi puarte ricuârts e tantis musis cognossudis e dismenteadis, lûcs dulâ o foi une persone feliç, o no; mi sotere sot di dute la mê vite.
Al é tant ce sielzi. Cetancj sintiments di rivivi!
Jê mi scrusigne tal cjâf, te memorie, simpri, cun costance.
O ai dibisugne di jê. Jê e je il pont di partence dal gno lavôr.
Mi mene simpri, e somee une tirane. E crôt che o vivi dome par jê.
Ma o ai une vite a la lontane. No capìs che o ai un lavôr, progjets, i miei passetimps, amiis… e une famee.
No i impuarte! Mi brinche par oris denant di un sfuei di cjarte. Mi tormente. Mi stice.
Tantis voltis mi robe la sium. E cuant che dute la cjase  e tâs tal durmí o stoi leint e biel corezint i miei scrits. Il cidin complet e la solitudin a son amiis preziôs però che mi fasin paiâ masse cjâr pe sô compagnie. Il dî dopo o soi un zombi.
Cheste leam probabilmentri al é dificil ancje par jê, parcé che no soi stade adestrade te art de scriture.
Tal fin, o ai di dîsi “graciis” par dut ce che mi regale. Mi met in face di un mont che no cognossevi. Mi oblee a cjoli il tamon cun fermece e perseverance.
I erôrs che mi fâs viodi mi sburtin a miorâ la scriture, a zontâ plui colôrs a la mê palete. O voi indenant. Mi é cjapât il mateç di scrivi e o soi cetant contente. Mi á judât a esplorâ il gno  mont interior, a tornâ a netâ di polvar il passât e ancje a pensâ cemût che al podarés jessi il futûr.
Jê e da une gnove sfumadure ae mê esitence. E je tant che un “Big Bang” che mi à veve mudât intune scritore.
Jê e je il principi di dut, la scluse che si vierzi al zûc e al divertiment. Cheste scluse si clame: IDEE.

di Norma Romotowski (Ghiringhel)
#1619

2 comments