CC24Avrîl#17 – L’arc di Sant Marc

#17 – L’arc di Sant Marc

«Ce confusion. Pignatis, plats, di lavâ, e cul pastiel che al è là di fūr tal curtîl, che cu lis scarpis a àn puartât dentri, il paviment al è dut un pantan e ancje chel al è di lavâ».
«Fûr ancjemò al plûf e no sai cemût che o podarai suiâ lis cjamesis e i bregons par doman par chei oms».
La fumate, che là di fûr in chê mufose domenie e veve glotût dut il paîs, zontade a dut chel lavôr che e veve di fâ, a vevin scurît i voi turchins di Rose.
I vôi legris di une biele femine, simpri pronte a mostrâ a cui che le cjalave, la sô lizerece e la sô buine gracie.
Une buine gracie, che chel dopo di misdì, Rose e veve dal dut pierdude e e jere par dabon rabiade.
«Indulà sono lâts chei doi salvadis? Josef, che lui ai maridât cun tant amôr, dal sigûr, come ogni domenie, al è lât te ostarie, e Marc a viodi la partide. E podevin chei doi pelandrons restâ a cjase par dâmi une man. Bastarts, soredut il prin, che al ven a braçolâmi dome cuant che si sint sglonfâ là sot. Ma no perdoni nancje il secont, ancje se al è gno fi Al podarès ancje lui dâ une man a sô mari. Al è di trê mês che lu prei di netâ i veris dai barcons. Jo o soi masse piçule par rivâ cu la man tant adalt. Ancje lui al è spudât a so pari. E jo o soi une puare disgraciade, e dut parcè che o soi nassude femine».
La rabie di Rose a jere cussì cjalcjade, tant che si jere acuart ancje il cjan, che pe pôre al vuacave tal curtîl.
«Vonde, vonde, cun vuê e à di finî cheste solfe. O soi stufe di fâ la lôr massarie, e cun doman se no si stirin la cjamese e i bregons di bessôi a van a vore  in mudantis e canotiere. E lu fâs soredut, come mari e femine, par Marie, chê frute, che Marc nol viôt la ore di maridâ. Biade, se no dreci il cjâf a chel fantat, e fai capî ,che nô feminis o vin la stesse dignitât dai oms, chê puare frute, e deventarà une disgraciade come me».
Tal curtîl, intant, il cjan al veve finît di vuacâ, e un aiarin fresc al veve puartade vie la fumate. Ancje il cîl si jere fat plui clâr e là jù, no tant lontan, jenfri chei pôcs nûi che a svolavin vie, al jere aparît l’arc di Sant Marc, che cui soi colôrs, forsit, al voleve, no dome lusorâ di gnûf i voi di Rose, ma dai ancje reson.

di Nello Malisano (Gjino)
#1615

2 comments