CC24Avrîl#06 – Sot lis glicinis dal bersò

#06 – Sot lis glicinis dal bersò

A mi mi plasin lis lungjis feveladis familiârs, miôr se fatis sot lis glicinis dal bersò, dulà co rivîf il passât, o feveli dal presint e o imbastîs programs pal futûr.

O soi cressude a la pâr de famee. Par agns o vivei cun lis gravidancis di mê mari, transitant cun jê chei moments emozionâi e stramps.

O ai nûf fradis e o soi la plui grande e la uniche fie femine. No mi soi mai sposade e no par mê volontât, dome Diu lu sa.
E cussì al fo che lis vicendis de vite mi puartarin a sei chê che vuê o soi par dute la famee: la gnagne Eleonore.

In etât adulte o restai bessole in cheste grande cjase, za che i miei fradis, un daûr chel altri a svolarin in altris nîts.

La cjase e pareve disabitade, però no jere cussì: ogni stanzie e à vût e à varà i siei sunsûrs e ricuarts che le fasin vive.

Cul lâ dal timp e tornà a popolâsi cun vôs gnovis e ridadis zovinis.
Jo o organizi inovâi e compleans di ogni singul familiâr. La mê autoritât di matriarcje e je benvolude e rispietade.

Cun ansie o spieti la prossime riunion, savint che al brindis cualchidun dai oms si sbotonarà il gilè e si impiarâ un zigar, indalore jo cun bocje ridinte o metarai i voi in sfese ricognossint lis arabeschis figuris che i bovui dal fum a van formant, ripuartantmi aes vecjis riunions familiârs de mê lontane infanzie.

di Galliano di Buenos Aires (Fuschi)
#1603

2 comments