La Stagjon des Contis a Codroip – La Croniche

E ca o sin, a regalâus un pocje di croniche de serade di Vinars di sere, che ae fin, stant che a Zenâr e jere la Gruesse Sorprese, e jere une sere di presentazion – la prime – la nestri/vuestri libri “La Stagjon des Contis”, fat sù doprant une biele grampe de CorseCurte22.

La serade, come che o savês, le vin inmaneade li de Sale Abaco, in gracie de poie di Pierina, che cun di plui e je ancje jenfri i autôrs dal libri, e come che nus capite, stant che o vin une alergjie a lis presentazions classichis, cu la int sintade che si fâs domandis e si dà rispuestis, noaltris o vin metût adun un piçul spetacul.

Sì che, o vin pensât ben di lei cualchi conte dai 6 autôrs che a jerin rivâts ai prins puescj de classifiche de Contecurte, ancje se in sale o vevin dome un, ma o vin pensât di no lei lis contis dal libri, ma altris, cussì i vin lassât dut il gust a cui che lu à cjolt di leilu, cence robâi nancje une conte. E vonde cussì? Eh, no! Lu savês ben che il nestri Ostîr al è un economist, no mo? E alore chel matuç si è inventât un strategjie di sconts ontecurtics par cui che al cjoleve il libri e al pescjave un numar a câs –  di 1 a 45 – dal zeut che i ofrive la nestre gjatemarangule. Parcèèè? Parcè che insiemi cul Peteçon de Ostarie al à let lis Ontecurtutis, une sdrumade di mini contis che ti restin intor tant che une magle di vueli. E a cui che al pescjave, ce sajo, il numar 18, si leieve la Ontecurtute #18 e al veve no 1, no 2, ma ben 18 centesims di scont par cjoli il libri! E stant che al coste 10euros, insome… robononis!!!

E dongje dai salûts de assessore Silvia Polo, che par fortune no si è cjapade masse sul seri e e à scherçât cul Ostîr, ancje se e varès volût copâlu (ma i tocje metisi in code) o sin lats dret par dret a lei contis di Alessandro Valoppi, Astrid Virili, Margherita Cogôi, Serena Fogolini, Rudy Citossi e Laurin Zuan Nardin, cu la vôs dal solit Famei Checo (che come par solit al à rivât a pierdi un sfuei cul finâl di une conte), de Sartore Astrid, dal Mestri Zuanluche e dal nestri Muini Stiefin, che cun di plui us à regalât chestis fotografiis.

E dopo nus è vanzât ancje il timp par mangjâ insiemi une fete di colombe e une fete di salam cjocolatôs. In sumis… se cheste jere la prime prove, par la seconde, che o fasarin a Cjamin al Tiliment, sabide ai 6 di Avrîl, no si pues che fâ ancje miôr. Un graciis a ducj chei che a jerin e sperìn che ducj si sedin divertûts. Noaltris de Ostarie… Sì!

1 comment