Il coçon

Toni, brâf om, su la cincuantine, maridât cun Taresie, un pôc plui zovine di lui, ai timps la plui biele dal paîs, al viveve vonde ben.
Al lavorave, come cuasi capo, intune imprese dongje cjase, la paie a jere buine, no vevin vût fiis, ma ancje se cun cualchi rimuarçs , no i davin pês e a profitavin de situazion par gjoldise.

Une des passions de cubie al jere il “ballo liscio” e no pierdevin ocasion par lâ in cualchi sagre a balà, a jerin vonde bravuts e la int ju cjalave balâ e vulintîr i lassave puest sul breâr.
Unic piçul neo di cheste situazion a jerin i cjavei di lui, che cuant che al veve trentecinc agns, no si sa par cuâl motîf, al jere restât coçon dal dut.
Toni nol dave impuartance al fat di jessi coçon, ma Taresie i rompeve un pôc i tacs.
“Tu mi someis gno nono, cuant co lin a balâ mi pâr di balâ cuntun vecjo” i tontonave avonde di spes e e zontave parsore “Ciale il to ami Milio, al è de tô classe, lui ju à ancjemò ducj e biei scûrs, al somee to fi”
No passave sabide o domenie, se lavin a sagre, che jê no tiràs fûr la cuistion dai cjavei e Milio di ca e Milio di là, che ancje chel al lave simpri pes sagris a balâ, che Milio al faseve fâ biele figure ancje a la balarine che e jere cun lui…
Stuf di cheste naine, un dì, Toni al cjape coragjo, e cence dî nie al va tal paîs dongje, dulà che al cognosseve il barbîr, so compagn di scuele a lis mediis, e cul consei dal figaro al ordene un piruchin. “Mi plasarès ch’al someàs ai cjavei di Milio, che tu lu cognossis ancje tu” i dîs, “Cussì le femine e finissarà di rompi i tabars!”.

A passin vot dîs e il barbîr lu clame: “Ven ca lunis matine che, a buteghe sierade, ti mostri come che si met sù e che si ferme il piruchin, cence ve int tra i pîts”.
Toni, lunis matine, cence dî nie, al jes come par lâ a vore e invezit al va dal so amì barbîr.
Si sente, il barbîr i mostre, i spieghe , i fâs viodi come fâ, i fâs fâ a lui un pâr di voltis par cjapâ confidence cun chel argagn.
Si ciale tal spieli “E à reson Taresie! “al viôt un atri om, zovin, biel, une vore diferent di chel che al jere cence cjavei.
“Cumò vâstu a vore?” i domande il barbîr.
“No, torni cjase a fâ une sorprese ae femine!”

Al rive, al sune il campanel, al sint vierzisi il barcon e Taresie che e dîs
“Milio ven sù di corse che o vin une orute prime che al rivi a cjase il coçon”.

di Pauli Fantini
#1575

1 comment