CC24Març#23 – Metropolis

#23 – Metropolis

La biciclete e clope, biel che il vieli parsore al clotee la bocje, forsit lant daûr di une cjantose sporcacjone, forsit dome saludant cun cualchi avemarie ben cuinçade. 7.37. In perfet orari su la sô aparizion abituâl e tal plen de sô maratone ator pe citât. Ca di dôs oris, suiade la rie di tais in centri, si lu viodarà su la un a jessî dal solit discount, in man une sporte che e lasse scuviert il cuel di une butilie.
Su la siet, un om in gjache e golarine al ven fûr di un palaç cuntune fantate in vieste di cjamare che i si strenç intor. Su la doi, da la puarte di li che al jere saltât fûr chel stes om la buinore prime, e jes une altre femine cu la muse sbarlufide che e ten par man un frut sui 7-8 agns, il russac che al pindule su chel altri braç.
La cuatri e mostre une vecjute che e puarte fûr il bidon dal umit, ancje se a passaran dome vie pe gnot a disvuedâlu. Cualchi minût dopo, Marie des scovacis e tache a sgarfâi dentri, cjatant cuasi simpri alc che i smechi. Dal rest, no somee une femine dai guscj dificii.
La trê e je simpri dificile di controlâ. E da su la stazion des corieris e a chê ore alì al è impussibil di stâi daûr di ducj chei che a rivin o a dismontin. Cu la code dal voli, al lume i doi marochins che si svicinin ai fantats, lis mans in sachete, a saludin cuntune pache su la schene, a strenzin i dêts e po a lassin sparî lis palmis dentri dai jeans.
Su la nûf un african al scjasse il curtìs cuintri di un altri neri, denant dai voi scaturîts di un pendolâr che al tache a cori slontanantsi dal viâl de stazion dai trens.
Un dai tancj tors in citât al bat lis vot.
Il tecnic al scjasse il cjâf. A saressin cussì tantis robis di dî, di chês gnotoladis di vigjilance. Dal rest, lui al è dome un dai cuatri dipendents de cooperative che e controle lis telecjamaris instaladis par sigurâ che e vignedi rispietade la ZTL in vore di cualchi mês. Al spessee a segnâ “dut regolâr” intal modul e si invie ancje lui, pront par lassâsi gloti de metropoli.

di Fuguline (Teresine la çuete)
#1590

2 comments