CC24Març#21 – Âstu un desert tal cûr

#21 – Âstu un desert tal cûr?

O soi une gjornaliste, ma no de RAI o de BBC, ma ben di une modeste riviste che e ven publicade intun borc de citât di Buenos Aires.
Une matine, il diretôr mi dîs: “Tu sarâs ben buine di scrivi un articul fûr dal comun, che noaltris o podedin publicâ, un articul che al vadi vie dai problemis locâi”.
Il teme al jere: “Esistial un desert te vite di ognidun?”
O crodevi di murî. Nol jere un bon teme. No po!
Dulâ a jerin lis ideis? No lu savevi. No cjatavi il mût di scomençâ.
Il teme mi mandave in crisi. Cussí che, cence voie, o vevi tacât a cirî di cjatâ fûr il paron di un desert. O tacai a domandâ a lis personis se si pues scuindi un desert tal cûr. O ai scomençât te cjase dongje, la cjase di Elio; lui al jere sentât tal curtil biel cjalant il ort. O pensai, chest al é un bon moment, e o fasei la domande. O cjatai une rispueste! E cheste mi á lassade scaturide!
Lui mi á contât che te Italie, il so país di nassite, al á fat la vuere vie par dîs agns che no finivin mai.
Chest avigniment cetant disgraciât lu veve puartât in paisâçs diferents: i boscs de Jugoslavie, lis sôs cjaris Alps e fintremai intal desert in Libie!
“Il nestri cjamp al jere un lûc teribil, il soreli ardint, il savalon ator ator che nol finive mai e che si sfantave intune tampieste sflomenade… il cjalt infernâl, la dissenterie, l´ospedâl, il tornâ in Italie par curâmi e… la Grece!
Daspò o ai domandât a une amie. Mi à subit mandade la rispueste. Mi á contât che doi mês indaûr e veve pierdût i siei gjenitôrs: “O soi cetant lancurose, mi sint bessole, bandonade. O crôt che ancje Diu mi vedi bandonade. Il gno cûr al é frêt, al somee un toc di glace… dute la mê vite e je cambiade intun desert blanc, inospitâl cul vueit che lôr mi a án lassât”.
O continuai a domandâ… la int e continuave a contâmi lis sôs storiis. Ducj a vevin i lôr deserts.
Cussí o tiravi dongje materiâl pal gno articul.
Ancje io! O ai scuvierzût il gno desert. Al jere propit cuant che mi mancjin lis ideis par scomençâ un gnûf lavôr, par fortune… a comparissin simpri!

di Norma Romotowski (Ghiringhel)
#1588

1 comment