CC24Març#15 – Il mont al jere lì

#15 – Il mont al jere alì

Propit ca!
In chel Istât a vevin fat une dure vore cun lens e cuardis, svuedant un tronc vieri cjatât ta la spuinde. Une barcje par traviersâ il palût. Spedizion storiche. Trê Erois. Ai gjenitôrs di dî nuie. Nome che a lavin a zuiâ a Robin Hood. “Sigûr mame, no mi svicini a la aghe, che no je nete come che dal mâr. O corìn nome tal bosc”. “E il martiel e lis cuardis a son par comedâ i arcs e fâ lis frecis. O starai atent a no pierdiu. Lu ai prometût al pai”.
La euforie spedizionarie no veve sorevivût a la prime prove di flotament. La bandiere a prore cu lis sie iniziâls e jere stade la ultime robe viodude prime che la “Enterprise” pene batiade e restàs sot aghe.
Par un moment si jerin imbramîts. Daspò i trê a jerin lâts di corse fin tal ôr de aghe, e cun lis mans in cercli ator dai voi a vevin scrusignât il font dal pantan par tentâ di capî come la nâf di tantis fadiis si fos incjastrade cence podê movile un pêl.
“Cjale, il gno von mi a dit une storie che chi disot de aghe al è un mont in spieli al nestri. Pensait alore che salacor nol è che si fonde, a stan tirant par jù la barcje!”
“Monadis!” al veve rispuindût.
Lu vevie dit Pieri o Toni?
I sflorive un tic di malincûr.
Un al jere partît masse adore. E chel altri cun tancj agns di emigrât tant lontan al jere deventât dibot un forest.
Cuntun pâl al veve scrit par tiere lis iniziâs dai nons e cjalât tal font de aghe cui dêts in cercli, ator dai voi inrossâts.
Al tornà di bot ta la machine, parcade te autostrade.

di Zorç Cesaratto (Matungo)
#1582

1 comment