CC24Març#14 – Ad ôr

#14_Ad ôr

Tirât, il fantat si jere comedât par tiere e al veve tacât a preparâ. Al tremave un tic, tant che simpri cuant che al messedave il polvar te sedon e al indreçave la siringje; tant che simpri, cuant che la passion dal sbatiment e veve tocjât la colme.
Se al podeve, al vignive a fâsi alì, dongje de aghe, no parcè che al jere biel – ta chei moments il mont nol veve formis – ma parcè che nol jere nissun e al podeve argagnâ in pâs. La aghe e jere une striche grise che e veve l’amâr dal fier. Il cîl, tant che la grave, un pês bas e dulint. Cussì ogni volte, cussì ancje in chê volte.
Dome che, a colp, intant che al misurave se dut al jere pront, une lûs e veve començât a slargjâsi ator e a bagnâ dut. Forsit al jere un nûl che si veve viert, forsit la angoladure dai rais dal soreli che e jere mudade, ma dut si veve impiât di colôrs. La aghe e jere deventade vive e la sô trasparence un cjant che al clamave.
Il fantat al veve fermât la man, incantesemât par chê maravee che e gafave dut, ancje lui. La grave e jere un slusî di vivôr e ogni clap une rose che e sflorive. Jevant il cjâf, si inecuarzeve di intivâ il divignî lent des monts e l’abìs lizêr dal cîl. Al cjalà la siringje, tal dubi di jessisi bielzà fat, ma e jere ancjemò li, cree. Si voltà cussì ancjemò a gjoldi il ridi de aghe, dai claps e di dute la maravee dulà che si sintive infondât e che i pareve no vê fin.
Ma la fin e rivà. Cussì come che e jere vignude, chê lûs si jere smavide e dut al jere tornât pesant, dulint, frêt. Il fantat, ancje lui frêt, ancje lui distudât, al cjalave ator. La siringje e jere ancjemò alì, dongje e lui al jere fer. Fer ad ôr di chê aghe che devant di lui e passave.

di Stiefin Morat (Catine la Nere)
#1581

1 comment