CC24Març#12 – Inte palût

#12 – Inte palût

O cjamini. Aghe scure fin intai zenoi, in cualchi moment. Un cjaminâ su lis aghis, ancje.
Un mazurin si alce lontan, spaurìt.
No soi fûr. Scûr ator, di ploie inrabiade, di cjanis e intric di jerbis a imberdeâ il pas.
No pues. Lâ… No indenant, no indaûr.
O soi cu la man alçade come chê volte tal ultin banc a scuele. Businâ un s.o.s. al cîl? Nol scolte. Forsi nol è. Dome nûl e aghe: a gotis fissis parsore, di pantan sot.
Gno pari – malatie, mê mari – vecjâe, il femore, joi…
Jo chi, inte palût ch’e supe.