CC24Març#11 – Une muart blancje

#11 – Une muart blancje

Cuant che lui al è sveât, ma nol pues lâ fûr dal jet, al è il moment plui pericolôs.
In chel moment il lambicâ dal cerviel lu puarte al probleme dal dì: Leu…..   Vonde cussì!, diagnosi sigure no ‘nd è ancjemò, e je dome la sô ment che lu beche tant che il corvat al beche la cocule: tu tu ás alc di mortâl dentri!  Ipocondriac irefrenabil, fin da piçul al sglonfave ducj i pidiments fûr dal ordenari e il piês, cun chest câs, al è che al veve creât la situazion lui stês: lui al trascrivè i valôrs dai globui blancs des ultimis cuatri analisis, par puartâlis al miedi. Chel lu varès lassât lâ vie cussì, al jere stât lui a scugnî clamâ la sô atenzion sul teme: ce stupit!… se no ves dite nuie, no sarès cumò a muardimi i dêts pe ansie. Leucocitos = globui blancs, 11.4 il valôr che al veve sunât il segnâl di alarmi e Dr. Google che al diseve: …un ecès di globui blancs al è un indicadôr di leucemie!… o murarai di leucemie!
Dîs indaûr, intant che al stave di sbris su Instagram, al viodè un videut di un birechin intant che al berlave disperât intune pissine, al preave ducj i sants dal paradîs par pôre di murì inneât, pendolant cu lis mans di un fier orizontâl, i pîts par aiar. Dongje, a cjampe, al jere un om in pîts cu la aghe sot dal zenoli e un altri che lu obleave cun lis tristis a sbassâ i pîts fin che al tocjave il font de pissine. Al veve finît cu lis vosadis dome in chel moment, mai al jere stât in pericul: la pissine al veve dome 30 cm di aghe.
Ve li, lui al è chel piçulut: cuintri di alc di insolit il so cerviel al met adun senegjaturis catastrofichis che lu fasin butâ fûr la anime ogni matine. Al jere sucedût cetantis voltis aromai che al varès vût di jessi usât. O ai di pensâ a cualsisei robe che mi lassi colâ il teme, o ai di lâ cul pinsîr intun lûc di calme!
Intun marilamp i ven tal cjâf il manifest dal film Dune: dôs personis a cjalin il tramont intun enormi e vueit desert dorât…
No!: sta cidin! No ti baste vê clamât dongje la leucemie? Âstu ancje di tirâ dongje un vier dal savalon!

di Marcelo Del Mestre (Ombre Grise)
#1578

2 comments