CC24Març#06 – 8 di Març

#06 – 8 di Març

Intal bosc al è simpri un troi scûr, come la mê vite, un troi strent che a mi gafe il stomi vie pal dì.
Soi stufe come mê mari, di stâ daûr di une tendute, spietant, savint che di là al è il mont.
Jo prime lu cognossevi.
Tal scûr dal bosc de mê vite o cîr une viole, piçule e palide come me, che a mi fasi compagnie.
Ormai no mi cjali plui nancje tal spieli… su la taule o ai impiadis tre cjandelis, ma no mi fasin lûs… e il marum mi consume, no mi fâs durmî.
Dôs voltis o ai capelât, doi oms a àn tradît la mê semplicitât o ignorance.
Soi cressude, ma cence la fonde dai afiets primarûi: un figot di cûr, une bussade a matine prime di scuele, sentâsi ducj insiemi a cene par contasale…
Masse vueits!
Ma doman o spalanchi i barcons, o gjavi lis puartis, che al jentri il profum des tarcetis e de mimose, mi fasarai judâ, o ai buine int ator.
Doman…
I prins pas, il bosc cui siei luncs faiârs mi vierç il sentîr, l’aiar de marine mi jemple lis narilis, di ca sù o viôt i sarpintaris dal Tiliment, ingredeât come la mê vite, ma Lui, al è plen di vite.
O ai decidût, mi butarai tes sôs aghis… Crote e blancje, come che o sint la mê anime.
Baste violencis, barufis, baste magheçs.
O soi, ancje se furmie, une creature di alc plui grant di me.
O voi, o tignarai il flât a lunc…
E po su, a fâmi bussà dal soreli di misdì frescje e temperade dal So e dal me jessi.
O soi ancjemò vive e ai voie di vivi!

di Stiefin Asquini (Siruc)
#1571

2 comments