CC24Març#05 – Colôr leon

#05 – Colôr leon

Il flum colôr leon nol à confins, no si viôt chê altre rive ma e je, sigûr tant che la lune si fâs ogni mês. I prins rivâts a croderin di vê cjatât un pâs par rivâ al ocean, invezit e jere la bocje grandonone dal flum: si vierzeve intune sossedade che e ricuardave un leon che tal cjalt de sere, indurmidît, al spiete la gnot par nudrîsi.
A son jentrâts in chê bocje cun braùre, cu lis nâfs grandononis tant che cjistiei sore de aghe e lis armis di metal lusintis. La int platade tal vert par viodi lis nâfs e veve la piel colôr leon, i voi scûrs e la muse cun dissens blancs misteriôs.
A deciderin di meti lis fondis di une gnove citât e a lassarin un grup di soldâts armâts a fûc e a tai. E lis nâfs a partirin a buinore, daspò de Sante Messe, biel lassantju cence semencis, cence feminis e cui pôcs animâi che a vevin: i cjavai di vuere e lis surîs.
I prins incuintris cun chei colôr leon a jerin stâts in pâs, ur vevin dât di mangjâ stant che lôr no savevin cumbinâ nuie. Ma nol jere passât masse timp par che a fossin slontanâts, pe arogance e lis violencis aes lôr feminis.
Par prin si jerin mangjâts i cjavai, parcè che no jere masse jerbe par rivâ a tignîju passûts. Lis surîs che no jerin scjampadis, ancje lôr a jerin finidis tal fûc. Daspò a tacarin a meti i stivâi te pignate, par dâi savôr ae aghe cjalde che bulive. E si jerin mangjâts il corean par cuietâ la fam di leon che e someave crevâi il stomi di dentri.
Ogni dì a lavin dongje dal flum, par viodi se lis nâfs a tornavin indaûr o pûr se rivave cualchidune gnove, de vecje tiere. E ogni sere a si insumiavin cence sperance.
Cumò no vevin nancje l’odôr dal corean brusât.
Une gnot scure un di lôr mâl metût par cirî alc di jemplâ il stomi, vueit di dîs, al veve saludât ducj. Te matine, chei che lu vevin cirût, no vevin cjatât nuie, ni la cjar ni il fûc. Lu vevin mangjât dulà che lu vevin cjatât tant che leons.
Ae fin a jerin tornâts chei di chenti, ma i soldâts a jerin cence fuarce par difindisi. A son stâts mangjâts ancje lôr, i prins oms cence la piel colôr leon tal ôr di chel flum larc.

di Noemi Salva (Mari de Gnot Nostrane)
#1570

2 comments