CC24Març#03 – Nictofobie

#03 – Nictofobie

Di piçul in sù o vevi simpri vude pôre dal scûr. E ancje di grant chê pôre no mi molave, intai puescj sierâts, magari cence barcons. Claustrofobie, mi vevin dit. E nictofobie.
E cussì, cuant che i miei gnûfs amîs di chel gnûf puest che o jeri lât a stâ, mi vevin dit, une sere, dai che o lin intal landri, mi veve vignude la piel un pêl e un pan. Ma dîur di no no podevi, cun dute la fature che o vevi condurade par fâmiju amîs!
Montâts in machine, vie nô viers il landri. O savevi che al jere un, pôc lontan, che si rivave fin dongje cu la machine, po bisugnave rimpinâsi cualchi minût, cussì mi vevin dit, e dopo…velu lì.
Mi tignivi strent pe mantie de puarte, cidin di tremarele, inmatunît. Cuant che la machine si é fermade, o ai decidût:
– Lait vualtris, jo us spieti culì.
– Ma ce dîstu? Anin a bevi un tai, no?
Une tape, alore e je une tape prin di rivâ sul puest? dai, bevìn chel tai!
E o soi cjatât dentri intune ostarie, cence savê ni lei ni scrivi.
E lì, po, bevi. Cuatri tocuts di formadi par compagnâ e jù tais. E balâ. E ancje jo o ai balât. Tant par parâ vie chel marum che o vevi dentri e chê domande: isal miôr incjocâmi frait prime di lâ dentri inta chel infier neri che al mi spiete o ben restâ sancîr par fâ un tentatîf di fâi cuintri ae pôre?
A son passadis oris. Fin che o restavin lì dentri, no jeri in pericul e magari ai amîs ur sarès passade chê maledete sbisie dal landri!
Cuant che nus àn parâts fûr de ostarie, che a vevin di sierâ, i amîs a jerin ducj imberlâts, a cjantavin a mat vie.
Cuntun fîl di vôs ur ai dit:
– Ma vino propi di lâ intal landri? Cun chest scûr, di chestis oris?
Une ridade che no finive plui, a ridevin ducj in coro. Lussian, il mancul pontât che, stant che al veve di vuidâ, al veve bevût mieç tai di mancul di chei altris, al si à zirât cuintri la puarte de ostarie e al mi à fat di moto cul dêt.
O soi zirât ancje jo e o ai fat a pene in timp a viodi la insegne luminose juste prime che a si distudàs:
AL LANDRI.

di Laurin Zuan Nardin (Ippogrifo)
#1568

2 comments