CC24Març#02 – Su la torate

#02 – Su la torate

No pues plui lâ fûr.
Almancul, vuê no.
Masse sdrassis intal cîl. A butin jù cui sa ce.
No, no ai propit voie di invelenâmi.
O cjali par aiar dal gno cjast. O ai fat tirâ vie une part dal tet de torate dulà che o vîf, sul cjastiel di Cucagne, e fat montâ une grande luminarie cuntun veri trasparent e une vore resistent.
Cussì o pues controlâ il cîl. Se a son lis riis chimichis no mi môf di cjase. E alore vuê nol è propit il câs.
Ciertis voltis mi samee propit di jessi in cîl, par aiar, su la mê torate ma o soi ben protet dal veri.
Al è un grant complot dai potents de Tiere in complicitât cui Iluminâts. Maladets! A àn cirût di metimi dentri il grafene, i maladets, cun chel sfondrât di sîr! No jere une vacine! Ma jo no mi soi fidât. A crodin di freâmi. Sù par aiar al è un davoi di sdrassis chimichis. I avions a vegnin di Lemuria, il continent pierdût. A vegnin fûr dai vulcans. A vuidâju a son i Retilians. Lemuria al è sot aghe di secui e secui. I vulcans a son in colegament cu la Tiere çondare. E je vueide la Tiere, no lu savevis?
“Mi samee che no sedi vueide la Tiere ma il to cjâf, Ustin!”
Tal zuri, tal zuri! Cjale che o ai svolât ancje jo, ce crodistu? O jeri partît di Kopenhagen cul avion ta chê volte. Prime di partî al jere rivât un machinari a sborfâ su lis alis une robe verde. Verde, come i retilians, mi capissistu? E cuant che o svolavin o ai dât un cuc par une barconete: o cjalavi il plui pussibil par dâur e si viodeve la sdrasse chimiche!
“Ma ce monadis dîstu? Al jere Invier, no? E jere une sostance par fâ in mût che no si glaçassin lis alis, cocâl!”
Uff, tu che tu sês di chê altre bande dal spieli, tu le varâs finide di dâmi cuintri! No tu mi freis!

di Atile
#1567