CC24Fevrâr#27 – Tes plaiis de storie

#27 – Tes plaiis de storie

Al jere rivât intal scûr di une ore cence timp, la fevele glotude di une barbe di mil dîs e voi supâts tes plaiis de storie.
Ancje se la sesule de seconde vuere dal mont no si jere poiade sui cjâfs di chê int, un aiar scalembri al veve mufulît lis semencis dai lôr destins. Une bore scure e veve impiade la gnot de umanitât lassant libare la flame de pôre. Cumò, tra la cinise, si movevin dome lis ombris de malfidence e dal odi.
Cussì, nissun si jere dât di maravee tal cjatâsal denant. Si jerin contentâts di sigurâsi che nol fos un planteclauts, che di fastidis a ‘nd jere za avonde cence cjapâsi sù ancje lis disgraciis di altris Stâts. Dal rest, aromai lu savevin ducj ce che al jere sucedût a chei biadins come chel li, che dal sigûr al jere stât un infier, ma cumò no podevin mighe mandâju ducj a cjase lôr a robâur il pan. E forsit al sarès stât miôr se chei cuatri che a jerin restâts a vessin trat i scarpets, o miôr i çucui, invezit di tignîsi strente chê dignitât stomeose di sorevivûts intai rudinaçs di cuarps bandonâts de anime.
La dì che a rivarin i polizai a tirâlu pai pîts nol jere un cjan par strade, ma di bot orelis e voi a cresserin intes andronis e pai barcons. Nissun al rivà a intindi ce che al jere daûr a sucedi tra chê barafuse di pachis e berlis. Pôc dopo, une berline si menà vie il scarsanali di chel om. Parsore dal so cjâf, su la spice di un cjapielat verdaç, il smalitâ di une acuile di arint e saludà il paîs.

di Fuguline (Teresine la çuete)
#1564

2 comments