CC24Zenâr#30 – Entropia e Boboros

#30 – Entropia e Boboros

Il gno non al à trê silabis. I lavris si tocjin dôs voltis, tenars come bussadis, e al tierç moviment la lenghe e sunsure maliziose lant a stiçâ lis orelis: bo – bo – rosss
Chest al è il nickname che o ai sielzût cuant che o ai discjamât la app sul telefonut, su po o savês ben cuale, la miôr pes cunvignis erotichis… E cussì mi fâs clamâ ancje dal vîf, cuant che o cjati cualchidune che e à voie di fâ gjinastiche cun me: Boboros. O volevi un non che al lassàs capî fin di subit lis mês intenzions, che no vessin di spietâsi di me cenis romantichis o lusôrs di lune o, diu nus vuardi, macs di garofui!
E di fat cun Habanera o passi lis gnots plui pevarinis, MoreInbore mi fâs i figots plui scjaldinôs, la Benzinarie mi mostre il so talent plui potent, insome no pues dî di vê seradis noiosis!
Fin a chê sere che o cognòs Entropia, diferente di dutis chês altris: bionde, riçote, elegante, ma cuntune inocence cussì esibide che tal imprin mi somee dut un truc par imberdeâmi ancjemò di plui.
Cuant che e reste cun dome intor la blancjarie di picet blanc, la muse i ven rosse come se e fos la prime volte: une reazion dificile di fâ par fente, o pensi.
E la sô cjandidece che si mude in ardôr (par me, dome par me) e devente carûl, malatie, droghe che no pues fâ di mancul.
E spalanche i voglons verts cuant che i conti lis mês aventuris di jet, come se no crodès pussibilis ciertis impresis acrobatichis, ma subit dopo mi sfide a metilis in pratiche. E jo no capìs se e impare ae svelte o se e je za dispatussade e e fâs la comedie, e cheste robe mi fâs zirâ il cjâf.
Cussì intosseât, cence cuasi inacuarzimi o deventi simpri plui sometût a jê, fin che une dì la viôt che e matee cul gno telefonut. Mi à a pene gambiât il nickname: o soi deventât Sotan.

di Stralunade (Muspilli)
#1537

2 comments