CC24Fevrâr#25 – Colibrì… Un messazîr des animis

#25 – Colibrí, un messazîr des animis

Al è soreli.
Il crût dal Invier al è indaûr. La cape di nêf e je disparide, planc planchin e fo biel inumidint la tiere, biel tornant il moviment di dut ce che al vîf. Ancje i colôrs a vignirin fûr.
E je la bielece de nature, il so sflandôr.
Al è soreli. O larai a contemplâle. O scugni fâ il gno mistîr.
O indreçai lis mês alis viers la sô cjase. L´aiarin de matine al jere lizêr e cetant dolç.
O fasevi cerclis larcs e o podei viodi cualchi carancho. Chescj cusins dai falcuçs a son uciei une vore elegants e biei; a somein i siôrs dal cîl.
O svolavi cuntune grande contentece. O pensavi, i darai gjonde… lu savevi!
Mi ven fûr un corteu di acrobaziis, mi sint come il miôr acrobat dal circul aerei. O lavi e vignivi, indenant e indaûr e o vongolavi parsore di un cjamp di lavandis. Daspó o continuavi pal gno troi.
Al è soreli.
I colôrs mi inmagavin.
Subit, daspó di jessi rivât là le viodei.
Jê e someave une fade tal so zardin, che al jere come un zardin des deliziis; al veve pomis, verduris e tantis rosis: il zessalmin profumât, i sclopons, cosmos, ibiscs. Plen di flôrs, al tirave daûr colôrs a fagots tant che la palete di un pitôr.
Al è soreli.
Nol è zovin peró al à une bielece speciâl, uniche, che e devente, dal sigûr, dute buine vite vivude. O cjalavi i siei voi, a vevin lagrimis. Mi jeri fermât bevint des rosis cuant che il “zun zun” des mês alis le a metude in vuaite. Besvelt mi soi platât daûr di un sterp di margaritis narançon. Mi fasei viodi, jê e faseve bocje di ridi. O zuiavi di scuindisi, plui voltis. Jê e saveve cuant che il zûc al finive.
O podei scoltâ la sô domande: Dimi cui che mi assist?
No podevi diial, al veve di bastâi sintîlu tal cûr!

di Norma Romotowski
#1562

1 comment