CC24Fevrâr#24 – Spirt di glace

#24 – Spirt di glace

E cuntune vosade Jesù al à rindût la anime.
Al è stât in chel moment che il cîl al è deventât scûr e un frêt antartic al à invadût la Palestine.
E je stade une robe graduâl.
Prime la sô crôs e à tacât a cricâ, a crevâsi e daspò a jemplâsi di chei cristai che nô o cognossin come chei de glace, chê che si poie su la jerbe d’Invier e, se tu i cjaminis parsore e fâs il rumôr di grissins che si sfruçonin.
Di colp e je partide une rie di glace jù de crôs, vie drete devant come se e ves di indicâ une strade, fasint saltâ di pôre Longino, il soldât ch’al stave cjalant Jesù cence movi un muscul par la pietât ch’al provave; cuant che al si è voltât par lâ daûr cui voi a chê strisse, ancje une sô lagrime e je deventade glaç, frêt, dolorôs e in chel al à capît: – Lui al jere pardabon il fi di Diu.
Daûr di lui, ferme come se e fos deventade di piere, e stave Marie, un lusôr tai voi ch’al varès podût disfâ chel glaç dome cuntune cjalade, ma il sô cûr nol veve chê fuarce.
E la glace no si fermave, anzit si ramificave, rivant tai vicui di Jerusalem e daspò tai cjantons de Palestine, fintremai a Masada, a Betania, a Cafarnao, là che e jere la sô cjase, e a Giaffa.
Dute chê tiere e jere cuvierte di cristai blancs. Ma une rie, une sole strade di glace, un unic troi trement, al respirave, al pulsave di vite, di amôr e di dolorôs distac.
Lui al â sintût ch’al rivave alc che la nature no pues pensâ e creâ, alc che nol aparten a chest mont. Vierte la puarte di cjase une fuarte svintade e a menât dongje chê glace e Josef al à capît. No une peraule. No un moviment. Sô fi nol jere plui.

di Alessandro Valoppi (Daûr la Lavagne)
#1561

2 comments