CC24Fevrâr#23 – G-4592345

#23 – G-4592345

Ve ca il me numar!
Al mancje pôc.
No soi bessole. Cumò te corsie o sin a miârs. Gotis tacadis, strentis, scliçadis, prontis a petâ un salt.
O viôt che di lontan al sta rivant il nûl, bocon, sglonf, grivi.
In curt o sarai ploie.
Une volte o soi colade te bocje vierte di une frute contente che e sbeleave cuintri il cîl. Une altre o soi sbrissade su la fuee di un agaç, marcolant jù fin tal poc des lidrîs. E mi visi ta chê volte che mi soi vongolade te aghe dal roiuç, si, propite chel, chel insom a la sgjave.
Ce figade, eh?
Mi è capitât ancje di travanâ i cjavei di une siore fasintle inrabiâ, o pûr tacolâ par ben une machine a pene tirade a lustri, o ancje di imbombâ la blancjarie picjade a suiâsi.
Tropis che a ’nd ai sintudis!
Ce biei timps!
Cumò lis robis a son cambiadis.
Lis ultimis voltis mi a tocjât lenzi il fier dai canons, sclipignâ i rudinaçs glaçâts di cjasis sdrumadis, mondâ i dêts sanganâts di une man frede che no si moveve plui.
G-4592345!
Ve che mi clamìn! Cumò o scuen lâ!
Sperìn di jessi une ploie gnove e buine.
Une ploie che e vuarìs.

di Brene Sfolmenade
#1560