CC24Fevrâr#22 – Fumate penze

#22 – Fumate penze

La fumate e jere penze, cetant di no rivâ a viodi plui in lâ dal nâs. Par chest al veve fermât di cori e al cjaminave cun prudence, sclope tal braç e baionete inestade, pront a fusilâ, curtissâ e sbudielâ cualsisei robe buine di movisi. Ma i tocjave cjaminâ a planc tant che une copasse, ancje parcè che al jere cussì impantanât che i tretars e i bregons a pesavin come sacs di blave e a menavin un casin dal infier a ogni pît alçât.
I siei pinsîrs a si alternavin jenfri stupideçs (se i taiavin i pîts sglonfs di umiditât e pantan par vendiju al marcjât, varessino vuadagnât di plui?) e robis plui seriis (i vignive un sfuarç a pensâ aes ultimis setemanis di cragne e pedoi in trincee e al scherç orent che i veve fat un camarade: i veve metût dentri la mignestre tocs di dêts di cualchi cadavar). Doi mês di chê vite e la sô saldece patriotiche e veve za scomençât a sfantâsi.
Chel ultin assalt, po, al jere il colm: profitâ de straordenarie fumate par rivâ fin ae linie nemie. Pecjât dome che no si rivave a viodi indulà che si lave e che dopo cualchi fusilade la lôr linie di atac si jere fruçade e i soldâts si jerin ducj dispierdûts, cussì che lui al jere di un toc restât di bessôl.
L’unic sunôr al jere il gorc ritmic dal pantan e de aghe dentri dai siei stivâi. Fintremai che un “clic” al rompè il cidin e la monotonie e lu fasè fermâ di bot. I vevin dite che prin di murî dute la vite ti passse denant dai voi. Lui al rivâ dome a tirâ l’ultin porco cuintri chê maledete fumate e cuintri il so gjenerâl, prime di saltâ par aiar come se al ves vût une mole sote dai pîts.

di Nonio
#1559