CC24Fevrâr#21 – Cold case

#21 – Cold case

Biel che si scrufuiave par sistemâsi lis pilicis e mangjâ une bocjade di cjâr secje, di bot, l’om al sintì une stiletade fuartone daûr de spale çampe. Al saltà sù cuntune rugnade di dolôr, e al le cun la man daûr de schene. Cuant che le tirà indaûr al viodè la palme dute cuvierte di sanc e al capì daurman che al jere stât cjapât di une frece, e che la ponte i jere restade dentri.
L’om si voltà e al viodè, di lontan, i siei persecutôrs fâsi sot.
Al cirì di scjampâ vie, ma za intun pâr di pas al capì che nol sarès rivât lontan. I clopavin lis gjambis, la viste si fluscave, e al sintive za la sensazion di bagnât dal sanc che i coreve jù pe schene.
Lu vevin cjapât ben.
Ma lui al continuave a cori. Al corè e al corè, ancje se i someave di jessi simpri fer. Al corè, fin che si inçopedà par tiere.
Alore al molà di scjampâ, e restant in zenoglon al tirà fûr il so arc e une frece. Ma i tremuçavin masse lis mans, e cun dut il sanc che al veve pierdût nol rivave nancje a smicjâ,
Si che al butà arc e frece in bande e al grampà la sô manarie cul cjâf di ram. Al cirì di jevâ inpins par spietâ i siei nemîs, ma lis gjiambis no lu tignivin. Al colà jù, cun la muse te nêf e il braç çamp fracât sot dal cuarp.
Al sintì i siei persecutûrs rivâi dongje. Al spietave di colp finâl… ma nol rivà mai.
Al fo lassât a murî su la mont.
Ju abàs, tal intant, inte vile, i paisans incussients di chei fats a cjalavin cun aprension i grancj nûi scûrs di tampieste che a jerin daûr a ingrumâsi su la mont clamade Similaun.

di Enrico Tomasi (Secretariât)
#1558

1 comment