CC24Fevrâr#20 – Atents al cjan

#20 – Atents al cjan

I doi si cognossevin di une vite, la lôr comunicazion e lave indevant tramit cualchi mot e ogni tant un smaneç par dâi plui enfasi ae interazion. La peraule no veve masse reson di jessi, stant che un di lôr nol veve pussibilitât di doprâle.
Bot e sclop dut al cambià par lui, pal so cjan e par ducj cuancj te Tiere.
Ancjemò nol è a clâr cemût, pûr al capità che di un dì a chel altri i nemâi dumiestis a tacarin a vê cundizions par esprimi cualchi peraule, si po, di comunicâ la pocje robe che a vevin tal cjâf.
Tal inizi a pandevin dome di vê fam, sêt o voie di lâ a torzeon e lu fasevin tes lôr marilenghis. Ve ca che cualchi paron al à vût di imparâ il persian par capî il so gjat tant che altris il todesc par prossumâ il lôr pastôr.
Man a man che a corevin i agns i nemâi a disviluparin plui competencis di resonament e di lengaç e chest al fo l´inizi di une sglavinade di problemis pe umanitât.
I nemâi dumiestis a jerin siôrs di informazions dai lôr sorestants, stant che ju vevin scoltâts par agns e a cognossevin i lôr blancs e soredut i neris.
Inalore intun tic e tac il purcit al jere parsore de taule, si po, une sdrume di peteçs a tacarin a pandisi ator. Di cjan a gjat, di gjat a paron e v.i.
In gracie che lui al jere stât dret te vite e slis cul so cjan chest mudament i de dome sodisfazions.
E tu invezit, trope informazion aial il to nemâl?

di Lenart Gjavedon (32)
#1557

2 comments