CC24Fevrâr#12 – Aiar di stale

#12 – Aiar di stale

Corine!… o soi chi!, al berle Ugo e jê e sint il cûr che i bat tal cjâf. Ancjemò!? E je la tierce visite. La Stella, la Frida e la Ursule a son contentis come paschis. E jê? A son di vendi e Ugo al è interessât. E interessant.
Il lavôr di tignîlis di cont al è deventât avonde grivi daspò la partence di Pieri. I piçui, il cjamp di blave, l’ort, la cjase, e trê vacjis! Vonde! O ai di vendilis! Ugo al varès di decidisi. Ma il probleme al è che Ugo nol decît.
Cuissà parcè? O domandi un presit cuasi ridicul par lôr.
Ugo si cjate dongje Stella, che e mugne cun dolcece e, cence pôre, lu lasse fâ, ancjemò di plui: Corine e pense che e vûl che la tocji.
Come jê? Mierde!… Soio gjelose di une vacje?
Il braç dret di Ugo, grant e fuart, si poie sul ombul di vacje e cun la man çampe al esamine i luvris. La man drete di Corine, in maniere incussiente, e ripet la azion e si tocje il pet. Dut tun colp e sint i voi nulâts, il cûr in bocje e il lat tai zenoi. L’aiar de stale al è plen di corint statiche, tant che prime di un burlaç. Il cjalt e i odôrs dai escrements miscliçâts cun il sô desideri a son une cumbinazion letâl e le fasin sintî debile.
La muse di Corine e devente rosse tant che une bore pe vergogne e e scuen lâ fûr prime di colâ par tiere.
– Mah?  Âstu decidût?
– O soi ancjemô malsigûr. O ai di slargjâ la mê stale se lis compri… A son bielis, zovinis, ben spaladis e a somein produtivis. Ti clami cuant che o ai cjapât la decision finâl.
– Ben!, o speri che al sedi ca di pôc parcè che o ai cualchidun altri interessât.
Ugo, sbassant il cjâf in segnâl di assintiment, al salude cu la man adalt e si met te sô machine.
Bausiis, no son altris interessâts aes vacjis, gjavât Ugo, che al pâr vê une justificazion par vignî a visitâmi… eh!: visitâlis…

di Ombre Grise
#1549