Adiriture! Ben po, graciis! Ma da rest, cuntune cjante come La canzone di Tom, no podeve no vignî fûr che…
CC24Fevrâr#05 – L’Arc di San Marc
#05 – L’Arc di San Marc
Cîl di cjarbon.
Nancje une cisile in svol.
Lamps, tant che cotulis di striis in fûc.
Tons, che rontonin tant che curtissadis in plene muse.
Velu, il burlaç di Avost!
Une ghigne improibide, un grum di plomp.
E ploie di stravint.
Intun moment, al è seren.
Une cisile e comede l’aiar cuntune gusiele di soreli.
E a somein diamants, daspò, lis fueis!
Lizerin al è il cidinôr, tant che lis plumis di ocatuts a pene nassûts.
Imbalsamade, la pâs e zuie e e beche cu lis gotis di sâl tai voi.
E lis pipinis a van indenant a madrac a rimirâ il gnûf miracul: l’Arc di San Marc.
Che al ven di adalt a imbraçâ la umanitât.
I siei colôrs, siôrs e vivarôs, e sparnicin emozions a zumielis.
Si messedin e si tocjin intun puint taront jenfri il cîl e la tiere.
La sperance dal vert, la fuarce dal blu, la positivitât dal zâl, il morbin dal ros, l’urli embrionâl dal naranç a son il sô regâl.
Il naranç al invide a tornâ a nassi, a cjatâ fuarce intal savôr plen de vite.
Il zâl al ilumine il mont.
Il vert al clame alc di plui grant di nô, intal vigôr de grande mari tiere.
Il blu al fevele di fiducie, di energjie buine.
Il perlin al ripuarte al spirt, aes sfumaduris plui luminosis.
Il viole al à il savôr de creativitât, di vuarigjon, di ricjece interiôr.
L’Arc di San Marc al dissegne un ôr di pâs, une striche di armonie di meti intor tant che un vistît di fieste grande.
Nus jude a tignîsi par man e a smicjâ i agnui, propit chei che o varessin tante brame di tornâ a viodi.
Almancul par un moment!
di Pierina Gallina (Stele Alpine)
#1542
2 comments
Lasse une rispueste
Dutis lis contis
L’ arc di Sant Marc dopo le bissebove, proponiment di pâs cu lis creaturis de tiere. Lussian