CC24Fevrâr#03 – Visiti di Mariute!

#03 – Visiti di Mariute!

None Mariute e jere une sclese lizere, come fuee di bosc d’Atom.
In stagjon, e inforcjave la biciclete, par vignî jù in plane a cjatâ sô fie maridade e i siei nevôts.
Fede sane, insedade, un fi muini e passion pe Bibie (che nus leieve par indurmidînus), e pasave ben siet cimitieris prin di rivâ chenti,  e a ogni tape une recuie par ducj.
Une des ultimis voltis e jere lade jù, cidine , in cantine, a lavâsi bessole i siei luncs cjavei di arint, ma jo, di scuindon i soi lât daûr.
Si petenave, dopo lavade, cun pietin di vues, e a murmuiave une nenie in latin.
– None, ce cjantistu?
– Ven ca Pin, cognossistu il Burlaç?Tu lu cognossarâs, ma no stâ mai spaurîti e vosi a fuart “Visiti di Mariute!” Scolte, o vevin a pene  finît di vendemâ, ma in chê dì o sintivi, jù pai gnerfs, dut un eletric: – Frute, o voi indilunc che il timp si fâs sù! E rivade sù de rive di Cosean, di flanc al cimitieri lu viodei!Cûr neri, gabane blu, cun finiduris di aur e bordò come i gardenâi.
Si sglonfà la panze e come lis trombis di Josuè a Jerusalem,  al petà un ton di fâ saltâ par aiar cops e veris di cjase. Al vierzè la sô bocje di fûc spudant saetis jù pe campagne.
“Soi il burlaç, Mariute, Ti impensistu dal talpin di roc stampât su pes scjalis di cjase tô?”
Tu âs cirût, a sun di sode e di rosaris, di parâlu jù, pensavistu di vele svignade? O soi ca che ti spieti!”
Il neri si slargjà, e ploie, come gusielis lusintis a vierzerin une scjale viers la sô bocje.
Dal simiteri o viodei alore dutis lis flametis tes tombis impiâsi e une vôs “Valà Mariute, frontilu!”
O petai un salt, e tor i bracs mi cresserin alis di pavee, e o svualai viers chel ingôs.
Dutis lis cjampanis dai siet paîs a tacarin alore a scampanotâ.
“Burlaç o soi Mariute, e il gno bon cûr cumò ti fruce!
Torne diaul tai tiei forans e no stâ insolentâmi plui par mil agns!”
Mi plantai ta chel voli scûr e lui al de un gran berli.
I nûi si slizerirìn, la fumate si poiâ e il soreli dorât al tornà a bussâ la tiere .
Ten cont frutin di ce che ti ai dit, ancje te vite, il scûr nol è altri che la Lûs che a stâ par jevâ.

di Stiefin Asquini (Siruc)
#1540

3 comments