Satan Klaus

Come che o savês ben, lis divinitâts religjosis no valin nuie.
A nassin dutis des pôris e des disperazions. Diu, Yahweh, Allah, Brahman, Anansi, Tlahuizcalpantecuhtli o cui dal diaul che o volês… comprendût il diaul stes, clare, a son dutis origjinadis par podê vuarî, evitâ o meti zucar intai fastidis dai umans adults, soredut chel de muart.
Ma cuant che une divinitât e salte fûr de gjonde e de ligrie, e cuant che la gjonde e la ligrie a son chês dai fruts, ben po… chestis figuris a àn une fuarce milions e milions (e milions, forsit) di voltis plui grande. Par chest, cuant che si mande une letare a Santa Klaus, cheste letare e à di scugnî rivâ.
Simpri.
Cun cualsisei dificoltât.
E par chest lui, Santa Klaus, stant che i fruts di spes a àn pene imparât a scrivi, o che a patissin di dislessie, o che a son svarionâts des milante robis che a àn di fâ intal lôr cjâf, al à pensât ben di creâ une divinitât par ogni falope che e puedi capitâ inte scriture de letare.
Santa Clauts? Al esist, paron de oficine.
Anta Klaus? Al esist, indenant e indaûr in cusine.
Sant a claps? Al esist ancje lui, bandis Tor e Tiliment.
Santa Kaos? Dificil cjatâle, tal casin, ma a esist.
Snta Klas, Satna Klau, San Taklau… A esistin ducj… ducj! Ma nissun al è sfigât come me. Sì, o vês ben capît cui che o soi. Baste vê let cun atenzion il titul e cjalâl il dissen.
E sì, o soi sfigât, o ai dit, ma nol è parcè che o sedi un bon di nuie, eh. No soi un armâr o une panarie, o un toc di fier spiçât, o un che al somee a un Sant di serie C di un popul dal lontan paîs di Tloquenahuaque. No, jo o soi un cu la stesse fuarce di Diu, ancje se contrarie, ma che al scuen, pe sô divignince, fâ i regâi tant che la seconde metât dal gno non.
E cussì, ogni stramaledete Vilie di Nadâl… Vie di ca, vie di là, puarte chest, puarte chel altri… une sdrume di regâi che o puarti, puntuâl e cidin, a ducj chei fruts che a fasìn chê falope inte lôr letarute, che cussì mi rive a mi.
Golarinis colôr bilite cjoltis dai cinês; imprescj a forme di çate di gjaline par gratâsi la schene; paletis pes moscjis eletrichis che no funzionin; discs di greatest hits dai Jalisse, Dvd cun ducj i films di Gabriel Garko dopleâts in corean; libris di Zâi cence lis ultimis vincj pagjinis; copiis maltaiadis di cuadris di Lucio Fontana; profums al caco salvadi cjolts in autogrill; set di shampoo e doccia schiuma che a san di muscli ma a son, di muscli; la tisane al zenzevar e kren cul cit sbusât par metile in infusion… E vie cussì, puntuâl e cidin sot dal pin di Nadâl.
Cemût? No us somein biei regâi?
Ehi, cuietaisi… O soi simpri Satan Klaus. Puntuâl e cidin sì, ma o fâs regâi di miarde!
E prin di lâ vie, di prionte, i crevi ancje une lusute sul filâr dal arbul, che no son timps di straçâ curint!

di Rafaêl Serafin
#1***

1 comment