CC24Zenâr#29 – Call me by my name

#29 – Call me by my name

Plui injù. Insot. Li che la tiere e devente cret, li che la vene si colore di fûc, li che il cidin si sconfont cul tucâ dal mont. Al è li che mi vês mandât. Il vuestri fradi bastart. Il plui sfigât. Che si podeve sacrificâ, che tant nissun no si sarès inacuart di nuie, nissun al varès domandât, nissun al varès patide la mancjance.
Par agns o ai sperât di tornâ a viodi la lûs, la cjarece dal aiar, il cisicâ de aghe, des bestiis e ancje il lôr, sì. Ancje chel dai oms. Lôr che par prins a àn lassât smavî il gno non, il so smalitâ taront jenfri i lavris, la sô fuarce che e tuche cuintri la lenghe prin di butâsi infûr.
Voaltris o jeris chei innomenâts, i preferîts par contis e liendis, i protagoniscj dai siums dai frutins che si spieglavin tai vuestris voi par slargjâ il propri cercli di pups e di biâts contadins. E jo? Jo o jeri chel brut, stupit e sporc. Chel che nissun si sarès sentât dongje par butâi mieze peraule, figurìnsi par condividi un fruçon, o il destin maltaconât intun paîs pierdût dal Friûl.
Biel planc però o sês colâts ancje voaltris. Guriuts, Tartaruts, Gans. Fintremai il Boboròs, il Maçarot, l’Orcul. Ducj scjampâts. Si son salvadis forsit striis e aganis, lis solitis putanis, ancje se aromai ancje lôr a fasin plui fature di un vucumprà a vendi cualchi incjant che nol dure il timp di une scjassade di nêf tune bale di veri.
Ducj tornâts dentri il cûr de tiere, in spiete da la fin dal mont. O dai umans.
Ancje jo mi soi fat sù te galete de dismentie, fin che une dì mi soi sintût tirâ indaûr, intune grampade di brame che no vevi mai sintût prime. E o soi tornât. E o soi fuît di gnûf. Umiliât.
Ma di dutis lis creaturis che a esistevin, vevino propit di violentâmi me? Ma pussibil che un Scrat nol pues plui vê nancje la dignitât di un spirfolet dismenteât di ducj, che o vês di tacâi parsore la muse di un coion di sghirat che nol fâs altri che cori daûr di un glant? Robis di mats. Lassaitmi murî tal gno no jessi. Ma lassaitmi almancul il gno non.

di Fuguline (Teresine la çuete)
#1536

1 comment