CC24Zenâr#28 – Cun me

#28 – Cun me

A jerin timps che o vevi la sigurece che o rivavi a puartâ jù cun me un om ae volte, cence teme di restâ bessole. Oms biei, studiâts o no, ma simpri dai grancj siôrs. Al podeve jessi un muradôr, un miedi, un contadin o un avocat, ma la culture de vite ch’a si puartavin dentri e jere simpri une ricjece par cui ch’i stave dongje. E jo, lassaitmilu disi, agane di rare bielece, o jeri une che i stave tacade, par secui, fintremai che il timp nol decît che par lôr e je ore di lassâ l’anime svolâ fûr de aghe.
Il timp, tal gno mont licuit, nol passe come su la tiare. La aghe ti cercene, ti cjape, ti protêç, ti lasse in pâs; l’aiar al è al contrari lizêr, ti oblee a cori, a fâ e fâ e fâ ancjemò, e la pâs te gjave. E cussì jo e Saveri o vin passât cuindis mês abraçâts distirâts sospindûts a cjalâ adalt lis lûs dal mont ch’a mudavin, dal naranç dal dì al neri de gnot, des sfumaduris rossis de Sierade a chês grisis dal Inviêr fin al blanc che ti incee in Istât. Cun Luche o ai balât par cuatri agns lant daûr de musiche che ogni gote e sune te orchestre dal flum, e cuant che o jerin stracs o lassavin vuidâ la curint.
Ma cumò, jo ancjemò un spetacul di agane, o ai ce fadiâ a rapî i oms di puartâ jù. Lis animis dal secul vincjesim prin no an la fuarce di chês dai cuarps ch’a plantavin clauts, ch’a gjavavin patatis a man, ch’a podevin misurâ in gotis di sudôr il lôr cjapâsi cure de famee. Vielm al è stât cun mê pôc mancul di trê dîs. Sandri un cuart d’ore. Lenart une gnot. E si son studâts adore come cjandelutis di complean che a lassin par un pôc il fumut dal ricuart e a dilunc la cere sformade de mancjance… fin ch’al rive un altri, che tu viodis bielzà jessi ancje lui une cjandelute scarmuline che si consumarâ sfantantsi des mês mans intant che o cîr di tignîlu cun me. E o viôt ch’al mi sbrisse tant che une fantasime ricuvierte di vueli.

di Daûr la Lavagne
#1535