CC24Zenâr#21 – Colpe dal pinel

#21 – Colpe dal pinel

Di dute la int pussibil a nô nus interesse Meni, mes comunâl. Ma ancje operari, scovacin, funzionari, vigjil. O sin intune matine dal mês di Mai. Lui al smonte de Ape comunâl. Cun sé al puarte la borse dai imprescj, pront a tacâ cu la cole i gnûfs manifescj eletorâi, su chei maladets panei di fier, scalembris, rusins, sigurâts par tiere cun blocs di ciment.
Rassin e vueli di comedon, par tirâ vie i cartelons vecjos, ancje doi, trê, fruiâts dal soreli e de ploie. Un al reste simpri sot, ma nol interesse. Une spacetade svelte e vie subit cul pinel che al slapagne la cole sul cuadrât di lamiere. Pontâ e svoluçâ il manifest. Tacât. Vie cul prossim.
Rivât al ultin panel, velu che il pinel si spache tal mieç. E cumò? A Meni i tocje tornâ tal dipuesit dal municipi par cambiâlu. Salacor di chê strade si ferme te ostarie. Il sgrasalâr sut nol pues plui spietâ.
Ma ce isal chel vecjo manifest sparagnât dal rassin? Meni si vise: un comunicât dal 2012. Viodût un alien a Mortean, alt cuatri metris, talpis di gjaline e cjâf a balon di rugby. Blocade la taronde, machinis fermis, telefonuts in casin. Carabinîrs, televisions, gjornaliscj.
Eco vierte la discussion te ostarie. Meni al ten bot. Ancje ai zîrs di tais. Par cualchidun a son dutis balis. Par altris la creature e jere vere. Blestemis. Fum. Altri butilion. Fat al stâ che la Ape e je tornade tal dipuesit vie pe gnot.
Crodi o no crodi, plui di miezis schedis anuladis a lis elezions. Come voto a ripuartavin “Alien di Mortean”, candidât a gnûf sindic.
Dut par colpe di un pinel!

di Massim Furlan (Brene Sfolmenade)
#1528

2 comments