CC24Zenâr#19 – Daûr des cuintis

#19 – Daûr des cuintis

Di plui no, che o sai di un gno cusin che par vie de agjitazion che propit il so lavôr e puartave al è restât sfracheiât e vie lui. Ma al va dite che misuris cussì no son facilis di cjatâ. Seste… Setime… jesus! E ce po ancje! E po, se un al va a vore li parsore… un pôc al va a cirîsalis.
Di mancul invezit… bon, se al è pôc di mancul, ce saio, une cuarte, al pues ancje lâ ben, anzit, al va ben dal sigûr, suntune cuarte si lavore ben, ma miôr che nol sedi masse di mancul, che si no no tu sâs mai dulà scjampâ o lâ a platâti, tal câs di une lûs impiade dal om bot e sclop o di une patafade molade a câs intal mieç dal insium. Cu lis secondis e tiercis, di fat, tu sês freât colp par colp. Ti tocje lassâ il lavôr a miezis, scuintiât e scunît, e lâ a cirî il durmî di cualchidune altre. Che tu cjatis, sigure… e je une vore di richieste, ma tu vâs a finîle simpri su misuris plui piçulis, che no tu sês mai trancuil.
Il miôr, duncje, come che us disevi, al è lavorâ daûr des cuintis… li sì che al è facil lâ a platâsi, par sfantâsi vie vie che la femine si svee, come che al è just che al sedi.
Daûr des cuintis si sta ben, si lavore cuiets, cun pocje preocupazion.
Ma lis cuintis no son facilis di cjatâ. Une cun chê misure, par solit, no à bisugne di te e no ti clame dongje. E duâr ben, ronceant involuçade tai bleons e cu la gote di salive che e bagne il cussin. Da râr e duâr centant mâl di clamâti dongje. In sumis… un casin!
E ce crodeviso? Che la vite di un vencul par feminis e fos facile?

di Milio dai cjans (Vercingetorix)
#1526

2 comments