CC24Zenâr#17 – Fîs de stelis

#17 – Fîs des stelis

“O jeri ancje jo ta chê sere di dodis agns za fa in code su la statâl, cuant che i telefonins no cjapavin e lis machinis a jerin fermis. Un zovin coragjôs al jere jessût fûr dal automobil, lant in cjace de misteriose creature che e veve provocât chel davoi! Il gjigant, alt cuatri metris, al devi di jessi saltât fûr di cui sa cuâl planet. Parcât la navisele intes braidis bande Mortean si jere fat un zirut, juste par scandaiâ, par cirî di capî in ce mont che al jere capitât. Dopo l’alien al jere disparît, lassantnus la ereditât di Roswell furlane (Mortean). Il zovin al veve vût la sô notorietât intun program de matine cun Magalli. Lu compagnave il famôs espert di UFO, Plutonio Tormiento…”
“E jo che o pai il canone par sintî chês monadis alì? E je une robe di vergogne!”
“Il servizi public al scugne da spazi a aveniments cetant impuartants come la vignude di un alien intes braidis di Mortean…”
“Ma ce monadis disistu? Ancje un mone al capîs che si tratave di un normâl struç scjampât di un arlevament. Lu à confermât, tradintsi, ancje chel dordel che al è lât inte trasmission, disint che l’alien al veve lis çatis come lis gjalinis!”
“Metiti il cûr in pâs! O sin fîs des stelis e il cîl al è siôr di cetantis civiltâts e creaturis, nestris fradis e nestris sûrs…”
“O ‘nd ai lis balotis plenis di chê intate che e vent libris di monadis… ju coparès ducj!”
“Ah… tu sês come Sant Tomâs… iejhfos òwxoduidf ofnfudg fdifun… skdidudj…. Edgdofhs…”
“Ma ce strane lenghe fevelistu cumò? Ustiment! AHHHHHHHHHHHHHH!!!!!!!!!!!!!!!!!!!!!!!!!!!!!!!!!!!!!”

(No stait a spaurîsi, int, ma il prin interlocutôr si jere tradît e i jere lât in tilt il tradutôr automatic che al voltave la lenghe de federazion galatiche intal furlan standard. Il secont interlocutôr al veve capît daurman cui che al veve di front e al jere scjampât berlant il plui lontan pussibil)

di Pieri Moràs (Atile)
#1524

1 comment