CC24Zenâr#16 – Pidimentade

#16 – Pidimentade

“Paraparesi”. Sintistu il sunôr da la peraule? Nol è un strambot. Nancje un mût di coionâti, che cualchidun ti barbote cuant che al vûl cjoliti pal cûl. Al somearès. Prove a sintî ancjemò une volte: “paraparesi”. No ti vignaressial di continuâ, ce saio jo, cuntun “parapapà”? Sù po! Dai, prove: “Paraparesi parapapà. Bum!”. Simpatic, no mo? Fossial stât cussì! Dome il coionament di un dordel, o intint. Ancje se a dîle dute, intun ciert sens, il coionament al è stât. E pâr di plui un di chei che no si puedin gloti, e nancje dismenteâ. Il piês coionament che al seti o che si podi imagjinâ. Vignût de bande da la vite. “Paraparesi”.  Il lengaç dai miedis al pues jessi talmentri crudêl di crevâti il cûr. E se tu sês une mari, tal creve dôs voltis. La cjarte e proferive la sentence, cence pussibilitât di apel. Impussibil sbaliâ: malatie degjenerative. Disfunzion dai articui inferiôrs. Sul moment mi à parût di murì. Anzit. Varès volût che il cûr si fermàs dal istant. Al jere come se daûr dal certificât le prognosi e volès dî: vignarà il moment che tô fie no podarà mai plui cjaminâ. No intint cori, inrimpinîsi sui morârs, zuiâ di balon, lâ in biciclete. Propite nie di nie. Nancje meti un pît daûr chel altri. Sielzi un biel pâr di scarpis, une volte fantacine, par lâ a balâ cul so morôs. Nie! Sentence definitive. Carocele. Pidimentade. Par simpri. Ma ce tante fuarce àno mai i fruts, che ancje cuant che a son tibiâts dal mâl a rivin simpri  a vê i voi plens di maraveis? Cussì o pensavi ogni volte che le cjalavi, le mê ninine. Distirade su le jerbe dai prâts, e cresseve bielissime, con doi voi lusints, bogns di in***zingarâ parfin le lune. Une pipine. Cui piduts cence gnerf, debii, discuinçâts. Ledrôs. Chês altris maris le cjalavin di scuindon, si disevin alc di sfrôs, e a slungjavin il pas braurosis dai lôr fîs “normâi”. Ma jo o ai imparât adore a capî di vê une frute “speciâl”. Le mê krivapeta. Che e tabaie cu lis stelis. Pie lis lusignis lis gnots di Astât. Sirene. Fade. Flabe. Magance de mê vite.

di Torototele
#1523