CC24Zenâr#14 – Rostcrazie

#14 – Rostcrazie

Une vore dispès Il so caratar i causave berdeis tai confronts di chei che i stavin ator.
Si sintive une anime no cjapade dentri, a ben che pe sô grinte naturâl, no faseve mai la vitime.
Cence podê mudâ il mont ator ogni tant i plaseve la adrenaline di lâ cuintri corint.

Colade par gracie di Diu intune famee aristocratiche e jere une moscje blancje intun nît di madracs. Le parave vie dal so marimont la sô particolâr sensibilitât par chei plui disgraciâts.
Di sigûr un mût di fâ no tramandât par vie di sanc, a pat che par gjenerazions nissun al veve vût voi par chei cence fîi d´aur tai vistîts.
In dì di vuê a puartâ indevant la nomenance de sô infeudade famee al è so pari, Antoni. Un om public, comprometût intun zuc politic cence timp pai siei e nuie mancul pe sô fie ribele.

Strache de sô clape e de cjaristie fûr dal so palaç e butà vie il mani de manarie e intun baticei e radunà ducâts e vistîts e e scjampà vie pe campagne.
Tal rivâ la sene e jere ancjemò piês. Se ben e cognosseve cetantis di chês fameis, che di scuindon e veve curat te citât vie pai agns, no veve a clâr la malabiade situazion di dulà che a partivin.
Dibot si cjatà intun brût di turbament e riviel, dulà che i contadins i davin la colpe de lôr miserie a chei maledets todesc imperiâi di Udin.
Dit e fat si zontà ae sdrume che propit chê joibe di Fevrâr e le cuintri di lôr.

Chel dì di carnevâl jê e fo la ugnule dame pure di sanc aristocratic, che e podè zirâ ator par Udin cun i siei propris vistîts.

di 32
#1521