CC24Zenâr#09 – La Mari de Gnot

#09 – La Mari de Gnot

Di cuant che a soi a stâ a Milan il rapuart cun mê mari si è indolcît. Tai ultins mês, però, secont me e je propite cambiade. Di cuant che e à tacât a lâ cu la equipe di strada. E je deventade mancul ansiose tai miei confronts, ma e reste malcuiete.
Mi à contât, sì, che e partecipe, ma no mi à mai dit ben ce che e fâs. Come se e ves pudôr, come se e fos une robe che e à gust di tignî par sè.
Gno fradi di cualchi timp le clame la Mari de gnot: un non plen di pompe, cuasi archetipic, insome une cjapade pal cûl.
Une setemane indaûr, che o jeri tornade a Udin par cualchi dì, le ai becade a tornâ a cjase a miezegnot e cuarante. Dute intabarade e ingrisignide, e je jentrade cun in man un pignaton vueit. “Eh, i vin puartât il mignestron”, mi à dite riduçant, intant che si disvistive e e puartave la sporte in cusine, “par fortune e jere ancje Mavi in machine cu lis cuviertis e Hamza, par fevelâur”.
La Mari de gnot e je une femine sui sessante cuntun rincjin tal nâs fat di pôc. E à cjapât il vizi di fumâ un spagnolet o doi cu lis compagnis di equipe. No le ai mai viodude in vore, ma o sai che e jes fûr tor 9 di sere il lunis, il miercus e il vinars, e e torne dopo di 3-4 oris. Ma la impensi a lâ tai capanons sbandonâts, in stazion, tai sotpas, e a svicinâsi ai disgraciâts che a stan alì, intabarâts e ingrisignîts. Ur ufrìs il mignestron, un pôc platantsi, cu la pôre sot sot di jessi acusade di judâ masse chei che a àn bisugne. Lôr, che forsit le clamin Mari. Cence ironie.

di Glorious Grene
#1516