CC24Zenâr#04 – Nurine la fade

#04 – Nurine la fade

Soi nade zimule. Mê sûr e je nade par prime, e veve plui puest, e supave par prime, la prime a fevelâ, a cjaminâ, a cjatâ il mistîr e lâ a marît. E lassìn stâ il siò nom, a mi ven dome che fastidi: Frida. Al jere scrit tal sacri libri che e sarès stade la fade de pâs. Cjò, cu la polvarine che i àn dât in dotazion, al è facil meti pâs tra i barufants; po a Nadâl, ducj si cuietin e jê e cjape feriis. Cumò, che al va di mode l’arc di San Marc, i an dât un portatil e jê lu dopre a sbreghebalon. Frida e je proprit une biele femine, bionde, slançade, voi celescj… nuie ce dî.
Jo invezit o soi Nurine, fade dal camarin e de cantine. O lavori 24 su 24. Il contatôr des feriis al è lât in mone e nol è personâl cu la qualifiche juste, che mi podi dâ une man. A àn pensat di dâmi doi sogjets che mi judin: une bolp e un corvat, ma a son plui lis voltis che mi son di intric. Come chê volte che o ai mandât la bolp a viodi ce che al sucedeve tal camarin di Bepo, un contadin de Basse che al veve purcitât e picjât i salamps, ma un sbilf di man lungje al voleve robâju. La soflade mi jere rivade de Adaviniche, une çuite, lare recidive cun agravants che e colabore par sot. O ai mandât la bolp che e je svelte, ma no tornave. Alore o ai mandât il corvat. Nuie di fâ, nol tornave. E alore soi lade jo. Soi rivade là cul flât a grops. La bolp e jere che si faseve fûr ducj i ûfs, il corvat al puartave vie lis fricis.
“Insiminîts!” o ai zigât “vuatris e il sbilf… folketitrai, fati  viodi, voltiti, che ti cjali… Berto Coce! Cheste e je la tierce volte che ti bechi a robâ. Il mês passât i kiwi di Meni di Vil di Var parcè che tu fasevis fature a cagâ. Dopo doi butilions di neri a Perteade: il miedi ti veve dite di restâ idratât. Cumò i salamps di Bepo. Vonde! Domande scuse, mole dut e va vie prime che Bepo al jevi e ti viodi… i podarès vignî un colp come te gnot de tempestade che i à fat fûr capanon e panei solars!”
E lui: ”A no mi free!”
“Bolp, corvat deit ju!”
E cussì prin che Bepo al rivi, la volp e sburte Berto par tiere e muart lis culatis e il corvat i beche la coce fintant che il sbilf al scuen  scjampâ vie, une man sul cjâf e une sul cûl. Ma se no jeri jo…
Cuant che i ai contât la vicende a Bepo, a mi a ringraciât cuntun salamp.
Al va simpri a finîle cussì: salamp, brovade, kiwi, sparcs, fricis, brusadulis, frico, un tai di neri, polente, formadi, luianie… Clâr che mi ven bultric, cûl e tetis e che mi impedissin di jessi atletiche come Frida!

di Laura Dri (Bultrik)
#1511

Note de redazion: lis imagjinis presentadis, par tignî platade la identitât de fade, a no rapresentin la vere Nurine.

2 comments