CC24Zenâr#03 – La metamorfosi

#03 – La metamorfosi

E alore o varès di scrivi une conte sul Diaul?
Cun 1500 batudis spazis comprendûts?
In veretât no varès tante voie. L’argoment no mi stice par nuie.
Trop àno scrit sul Diaul? O ai pôre di scrivi robis masse ordenariis. A ûs la solite menade di chel che al vent la sô anime. Il “Faust” di Goethe, juste par disi une.
Ce aio di fâ?
O podarès ispirâmi viodint cualchi film, saio jo? L’esorcista?
Lei cualchi tratât che al fevele di striaments e di cudicjs?
Ma il Diaul a disi la veretât nancje nol esist o miôr, al esist, ma si trate di une part dal om, la plui salvadie, bestiâl e suturne, chê che e prodûs i sassinaments, la tristerie e lis vueris ator pal mont.
E je une part che o vin ducj, cui plui e cui mancul. Ancje jo o pensi di vêle.
Il Diaul.
A mi mi ven dome di ridi a viodilu: cun chei cuars, lis alis di gnotul, lis ongulonis, la pelice, i dincj a ûs i cenglârs e altris monadis. E pûr une volte la int e jere dute spauride a viodi chês rapresentazions.
Mi vevin spaventât ancje me, us al confessi. O vevi viodût dai dissens di un libri medievâl ripuartâts intune vecje enciclopedie ma o jeri frut. Cumò no mi fasin plui pôre.

Mah? Savêso ce che o pensi? Che o mandi une email al ostîr e mi fâs cambiâ il teme pe conte.
E dopo o voi a fâmi un zirut.
Anzit, prime o fâs un zirut e dopo o spedìs la email.
O jes; o cjapi sù la machine. Ma ce àno di cjalâmi i vicins?
Adiu! A scjampin vie!
Cemût mai?

Ma ce aio inte schene?
Cuant sono saltadis fûr chestis alis? Alis?
No mi ricognòs plui! Adiu!
Adiaul!

di Checo Tam (Derna)
#1510

2 comments