CC24Zenâr#01 – Pecjât chel ros

#01 – Pecjât chel ros

Pecjât chel ros!
No mi à mai plasût il ros. Devant dal spieli, chel cûl ros mi à simpri someât une lune di sanc grandonone che e ven fûr di Istât parsore i arbui.
Nancje fevelâ! Il ros no mi va.
O soi simpri pront a fâ dôs ridadis, no soi mighe garp!
Si scugnive sveâju cuant che al jere ancjemò scûr, mal vevin dit. E o lavi tes cjamaris che no si viodeve nuie, pront par tacâ il davoi. Ma prin di rivâ dongje dal jet e partive une cjampanute mate e cheste int e saltave fûr. A barufavin, si viodeve che no jerin contents, ma no si maraveavin se fûr al jere ancjemò gnot. A van vie di cjase cui frutins cuant che al è scûr e a tornin di gnot. Dulà che a van, no savarès dîti.
Mi jeri platât dentri dal armaron, par cirî chê cjampanute intant che a durmivin. No ai cjatât nuie, dome un cjossul stramp parsore di une taulute dongje dal jet cuntune code metude dentri dal mûr. Stant che mi jeri stufât, i ai gjavât fûr la code, dome par viodi se si lagnave. O soi lât vie che ducj a durmivin e al jere biel alt il soreli, no sai parcè ju ai sintûts berlâ di bot.
Chê robe dal glimuç? Si piert dome timp, tal dîs jo! O vevi cjatât un biel troi framieç di un bosc, mi soi metût intun clâr par fâmi viodi ben. No sai se al jere l’Invier o la ploie, ma no ai viodût nissun. O soi lât plui dongje de citât, intun parc grandonon. A buinore a rivavin, plui oms che feminis, che a corevin di ca e di là. Ma no si fermavin par puartâmi vie. Dome al tierç dì cheste fantate bielonone mi à cjapât sù, o ai pensât che mi metès dongje il pet. Ma no puartave il rezipet! I lavin su e jù libaris, e nissun al jere scombuiât! Mi à puartât a cjase intune sachete e cuant che o sin rivâts e à clamât il gjat e mi à regalât par che al zuiàs. A mi!
O soi lât vie biel batint la bocje di chel gjaton. O ai molât il puest di maçarot daurman.
Mi disin che chi si lavore dome une gnot al an, che ducj ti vuelin ben, che no covente fâsi la barbe e che tes cjasis ti lassin di mangjâ e bevi.
Cemût ise la monture?
Pecjât, no mi à mai plasût il ros…

di Noemi Salva (Mari de Gnot Nostrane)
#1508

3 comments