Rocheton e il câs dal cjaruç sdrumât

— Fer Spilot! No stâ tocjâ nuie!
Rocheton al jere rivât svelt, corint cemût che al podeve. Cu lis mans sui zenoi al tirave flât a ingôs.
La sene e jere plui clare di simpri. Un cjaruç di len fracassât cun sot un cadavar. L’om al jere distirât sot lis breis e il tres plui grant lu veve sul cerneli, di traviers, a platâi la muse.
In bande un mus.
— Muart cuntun biel colp tal cjâf. — Al veve sentenziât Rocheton. — Ma di sigûr al è stât sassinât. Cui podaressial jessi stât? — E cun grande naturalece al veve zirât il cjâf cuintri il mus.
— Comissari. No crodaraial mico che al sedi stât il mus?
— Al è strani. — Al veve concludût Rocheton, cjalât la bestie. — Par solit il mus al è cjaviestri, rognôs e al è une vore dificil che al ubidissi. Par me al plate alc.
Spilot al veve suspirât, spietant une gnove teorie strambalade dal so vecjo sorestant. Ancje intune situazion cussì clare, Rocheton al saveve meti dongje dal nuie une storie di delits o copariis.
Cence inacuarzisi di cjacarâ a vôs alte, Spilot al veve sfladât fûr i siei pinsîrs.
— Prove domandial al mus!
— Tu âs reson Spilot! — Rocheton al veve sintût e di bot si jere svicinât a la bestie. E al veve cjacarât.
— Âstu alc di contâmi, mussut? Cjale ce biel che tu sês… Âstu sassinât cualchidun? Salacor cuntune biele scalçade? Vevistu cualchi fonde par copâ chel om sot i lens?
Spilot al veve sledrosât i vôi, viodint che il mus al mastiave a vueit, tant che al someave cjacarâ cul Comissari, deventât intun colp il gnûf San Francesc.
— Fers! Lassait il mus. No je colpe sô! — Al veve vosât l’om, tirantsi sù a strachis e spacetantsi cu lis mans i bregons e il cjamesot. — O ai cjapât sù un bachet ta chei baraçs in bande par russâmi la schene e la bestie e crodeve che e fos une scorie. Cun cuatri scalçs ben plaçâts mi à sdrumât il cjaruç. Il tres dal tamon mi à petât sul cjâf e mi è vignût fastidi.
— Spilot! — Al veve dit Rocheton. — Eco sberdeât il câs!
— Cemût ti clamistu? — Al veve domandât Rocheton al mus, come fevelant cuntun cristian.
— Nol à un non, — dissal il paron. — No ancjemò almancul. Jo o sai dome che cuant che al à sù la cjavece al devente indiaulât.
— Cjavece Indiaulade! Eco il non. Il non just ancje par fâ une gare!

di Massim Furlan
#1***

1 comment