Plat platât

Nol à plot sul plat platât che nol è plat ma al plate.

Al jere chest, l’indovinel di cheste sere, a cjase di Ferruccio. E jo no podevi plui. Ogni volte che nus invidave a cene cussì. Un indovinel, une filastrocje, une naine che al smaltacave tant che un piatto unico dilunc dute la serade, cence che mai nissun al rivàs adore ae soluzion, che no utu, al veve di ditâle lui, daspò dal dolc e prin dal amâr, simpri cussì, cun chê ghigne di Pape cence coions e chê ridade di nutrie impanade.
E si scugnive lâ, no utu, parcè che Ferruccio al veve sposât Gjovane, e Gjovane e jere la sûr di Melanie, e Melanie le vevi sposade jô. E alore… Non possiamo dire di no, ma cosa vuoi che sia, per una cena al mese. E jo, bruntulâ, blestemâ par sot, ma ce vevio di fâ? E poi è uno degli scienziati più importanti, in Italia, lo sai bene. E jo lu savevi, sì, i gjornâi ju savevi ancje jo, e mighe lu metevi in dubi, tal cjamp de astrofisiche al sarà stât ancje un luminâr, ma chê manie dai zûc di peraulis… al jere il piês al mont. Ti faseve dâ di mat. Ti gjaveve i atribû e tu stevis alì in taule tant che un Pape cence coions a San Pieri.

Nol à plot sul plat platât che nol è plat ma al plate. Ce isal? Daimo, su, al è facil. Ce isal?

Sì, al è facil. Come chel che bisugnave savê la teorie dai bûs neris, o chel che tu vevis di calcolâ une ossido-riduzion chimiche, par scuvierzile. O chel fondât su la teorie de relativitât, o sul boson di Higgs, o cemût che dal diaul si scrîf. Dai che al è facil chest colp. E jo che cjalavi la femine e la cugnade e trimavi di rabie ogni volte, che il dolç, par trop bon che al fos, mi deventave mareôs, stant che al jere vignût il moment dal disvelament.

Nol à plot sul plat platât che nol

E nuie. Jal ai spacât pal cjâf, chel plat che o vevi di front. E cussì e a fat Melanie cul sô, intant che al cirive di jevâsi sù. E cussì e à fat Gjovane, intant che al jere par tiere a rodolâsi e – si capive – al insisteve a volê disvelâ la soluzion, prin di tirâ i sghirets.

No savarin mai ce che al jere chel plat platât. Ma sierâts in preson nol è che al sedi un dai nestris pinsîrs plui impuartants.
A lui, dut câs, i va dât at di vê cjapât il Nobel par la teorie dal Piatto Unico Universale, ancje se i àn dât un Nobel alla memoria.

di Rafaêl Serafin
#1***

2 comments