Piatto Unico

Te vite mi son capitadis robis, ma la cene dal Piatto Unico e je une di chês che miôr si son implantadis tai miei ricuarts e che se a vessin di dâ un Nobel alla memoria lu vinçarès cence fastidis.
Che po, mi jere bielzà rivade la reclam jenfri lis storiis di Instagram e stant che come che o lei “All you can eat” soi za che sbavi tant che un alien daûr des luianiis. Ma insome… o seguivi la pagjine, o cjalavi lis fotos di cheste int passude e sglonfe, onte e maglade, strassomeade pe esperience… ma di li a decidi di lâ a mangjâ al Al Godere, di Matrignà, i coreve. Savêso… chei puescj che tu disis simpri, Une volte o vin di là, e daspò no tu vâs mai. In pratiche cuasi ducj.

Se nol jere par un gno amì, diu lu stramaledîsi, no mi sarês mai decidût. Dai vieni che ci divertiamo. Prenoto io. Dai che è tutto buono… E jo, bon, i ai dit di sì, ma no jeri mighe convint. Il fat al è che soi un che al mangje. E al mangje tant. E cheste idee di un all you can eat cuntun Piatto Unico mi pareve come chê di un Pape cence coions, par dîle sclete. No volevi spindi trente euros par vignî cjase e metimi a mangjâ wurstel scjaldâts tal micro e majonese de Lidl.
E ancjemò mancul convint o jeri cuant che il gno amì mi à dit di vignî vistût in tute e scarpis di gjinastiche. Eh, sai, è un posto molto alla mano, se ti vesti troppo elegante ti senti a disagio… fidati… Tuta e scarpe da ginna ed è okay! E poi si è tutti in una tavolata unica, con le panche, come a sagra. E bon, al è il teme dal locâl, pôc mâl, fasìn ancje cheste. E in efiets, cuant che o jeri li, al pareve di sei da U Fleku, Praghe, e a jerin ducj in tute come nô e no dome chel… a jerin ducj cidins, tirâts, che a trimavin di ecitazion in spiete de mangjative. A che ora arrivano i piatti? O vevi domandât. E chel sentât di front mi veve rispuindût come se fos un dordel. Alle nove, secondo più, secondo meno. E al veve reson.

Aes 9 si veve sintût un scloc. Di sot la taule un argagn al veve liberât un plat platât che mi jere colât sui zenoi e de grande puarte de stanzie une ventine di camarîrs a vevin puartât dentri une guantiere lungje sù par jù trente metris, cun parsore di ogni. Cueste, luianie, bistechis, sotgol, salam, persut, sopresse intal cjanton dal purcit, un côl di frico, une valanghe di cjarsons e un altri di broade e muset tal cjanton furlan, e paladis di vuardi e verduris e polistirolo li dai vegans, e daspò pastesutis amatricianis, cacio pepe, griscia, carbonaris, rabiosis, cul pestât di Gjenue, al ragù, ae norme tal cjanton des pastesutis, e dopo poleç, manç, cenglâr… e cemût no dî dal cajnton des fertaiis o di chel dal pes, che al pareve di colâ te friture di vrie, gjambars e calamârs (ma no gût). Cun di plui, chest al è dome ce che o ai rivât a viodi, parcè che al sunâ di une sirene, pene poiade la guantiere par tiere, tal mieç de stanzie, chei dusinte o ancje plui che a jerin tal locâl a son partîts tant che i zupets de bibie, comprendût il gno amî.

E cuasi nissun al doprave chel plat platât, si no par spacâlu sul cjâf di cui che i robave la ultime fiorentine o la ultime grampe di pastesute cu lis trifulis, ma ducj a paravin jù sul puest, doprant lis mans e gramolant cence fevelâsi, tant che bestiis. Pachis, stuartis, blestemis, contorsions, barufis… e jere cheste la vere cuince dal Piatto Unico, sdrumât cun jutori des spinis di bire e neri che a pindulavin dal sofit. L’Apocalìs, se mai e pues vê une rapresentazion, e je cence dubi cheste.
Soi tornât a cjase in cundizions di fâ spavent, domandantmi se o vevi di lâ in ospedâl o mancul par un tai su la cuesse e une conole nere che mi faseve viodi lis stelis. Une esperience devastante…
O ai bielzà prenotât par sabide che e ven.

di Rafaêl Serafin
#1***

2 comments