Pape cence coions

– Ma ti dîs che e je vere. Prime di metilu sù a controlin che ju vedi
– E jo ti dîs che e je une cagade, come chê fandonie dal Piatto Unico all you can eat
– Ma cjale, se o ves di scometi, cheste e je plui vere
– Ma no, çondar! O ai pene sgurlât su Wikipedia, e je une liende!
– Po, sigûr, se al fos vêr tal vegnin a scrivi su wikipedia
– Ma lasse stâ chel alore, ma si capìs che e je une stupidagjine!
– Bon, noaltris ce savino? E po no lu cjati mighe cussì scandalôs.
– Ma ti parial che si meti li a fâ tirâ jù lis mudantis al Pape?
– Eh no, se al è Pape, aromai il dam al è fat.
– E alore?
– E alore lis fasin tirâ jù a ducj! Ducj i candidâts, che che a puedin deventâ Pape.
– Ma daimo! Mole il bevi!
– Ti dîs jo. A metin ator la vôs che e je une liende propit parcè che met che un che no ju à al ciri di deventâ Pape lôr lu frein.
– Ma ti parial che si metin li a fâi tirâ fûr i coions a ducj i vescui, un di front di chel altri, tant che pervertîts?
– Ma no, lu platin cuntun plat, e je une usance antighe ancje cheste.
– Serio?
– No, scherci, cheste dal plat platât me soi pene inventade.
– E se un nol ves di vêju, se al ven fûr che al è une femine.
– Ma no… viodistu che tu sês un cjastron. Se e je une femine a lassin stâ e a votin un altri, cence spiâ nuie. Clare. Ma po nol è mai sucedût.
– E la papesse Gjovane?
– Chê invezit e je une liende pardabon. Cui aial di molâ il bevi cumò?
– Bon, si, tu âs reson, lu savevi. Volevi viodi se tu crodevis a dut. Ma… Se il riscjo nol è chel di une femine? Ce controlino?
– Eh…
– Eh?
– Eh… A àn pôre che al sedi…
– Che al sedi?
– Un alien!
– Bon cjale. Jo no sai se pe stupiditât a vessin mai di inventâsi un Nobel, ma tu tal meretis tu, e se tu sês za muart ti fâs dâ il Nobel alla memoria, cjale.
– Rît, rît… intant almancul sul Pape, fasint cussì, no rivin a meti sù un dai lôr, come che a fasin di altris bandis.

Ma no jere vere, clare. Nissun, inte storie de glesie, al veve mai pensât di fâi tirâ jù lis mudantis a cui che al leve Pape. E cussì, daspò di Innocenzo III, Giulio III, Niccolò III, Innocenzo VIII, Benedetto IX, Alessandro VI, Stefano VI, Alessandro VI, Sergio III, Bonifacio VIII e Giovanni XII, e cussì a Rome, ca di pôcs agns, al sarès lât sù l’undicesim Pape alien.

di Rafaêl Serafin

#1***

3 comments