Nobel alla memoria

I vevin dât chel non no si sa ben parcè.
Jê no veve mai domandât e dut câs cuant che di picinine, pene imparât a lei, e veve mastiât ducj i classics grecs e latins, e veve daûrman savût di jessi fie di Uran e Gea, mari di dutis lis musis. Si che, ce domandâ di plui.
E simpri pensant ai latins, si sa che a disin nomen omen, e jê, di ispirazion, ’nt veve cetantis che a dîs agns e veve za scrit un centenâr di libris e prin dai cuindis un miâr. Po dopo e veve tacât a mateâ cui murôs, lâ a balâ, interessâsi di gossip e sbelets e di libris, pûr trop, e veve burîts fûr dome une desene ad an, ma simpri di nivel e premiâts ator pal mont, voltâts in dutis lis lenghis.
E pûr no jal davin. Nie. Ogni an, tal zîr di scomessis, al vignive fûr il sô non, ma chei sturnei di Stocolme a tiravin fûr simpri cualchi scritôr discognossût, che al veve scrit alc su la condizion teribile de emotivitât des nutriis dal biotopo di Flambri, o un romanç ambientât inte teorie dal Piatto Unico dell’Universo o lis vicendis di un Pape cence coions o ce dal diaul, e lu cjapave lui, il nobel pe leterature.
A jê no i pesave. Juste un pôc di fastidi cuant che al rivave un gjornalist a domandâi se i pesave par rispuindi ogni volte che no i pesave.
Pûr trop e murì zovine, in maniere stupide, sbrissade suntun plat platât di une canevace. E si sa, cemût che a van lis robis.
I derin ce che si meretave dome dopo muarte, come simpri.
Nobel alla memoria a Memoria, a vevin titulât cuasi ducj i gjornâi, cence tante fantasie, come simpri.

di Rafaêl Serafin
#1***

1 comment