La zardiniere

Il fi di Milio si clamave Milio e al veve ereditât dal pari, in bande di doi voi colôr aghe fonde dal Celine e de schene di muradôr, il sens dal umorisim bastart e il gust pes matanis. Clare che, a un cussì, lis fantacinis i corevin daûr golosis tant che gjatis daûr di une vrie. Comprendude Samantha, cul th, clare, une frice di raze che e faseve voltâ il cjâf ancje a lis statuis di marmul e se e veve voie un om sal cjoleve e lu mastiave tant che un cingum. Ma forsit propit par chest, e jere simpatiche tant che un boiler. Che ti cole sul cjâf. Dal cuart plan. Cuant che al è daûr al plovi. Di sabide di sere.
In pratiche le veve cun ducj.
E par cemût che si vistivin – sfigâts e sfrutadôrs!
E pe machine che a vevin – cragnose e di puars!
E pai difiets fisic – ce brantiel! ce scovete! ce muse di flebo! di ce bande si cjalie?
Ma soredut par ce che a mangjavin, stant che je e jere vegane – e vergogniti ca, vergogniti là, e sassin, e carogne… e insome, a ducj cussì. A ducj fûr che a Milio, clare, che si jere imprometude di vêlu, e je varès petade, ancje se al pareve che lui propit nol volès savênt. E in efiets, lui no le sopuartave.
Ma us vin dite cemût che al jere fat, no mo?
E alore e rive la sere buine. A capitin a une fieste insiemi. E dâi un tai, e dai un altri. Ve che je lu incjantune tal scûr dal zardin e in doi e doi cuatri e je za cui zenoi su la jerbe e che cjape in… bon, dai, o vês capît!
Ma Milio, propit intant che la frute e mostre lis sôs magancis, al salte fûr cuntune des sôs.
«Ferme dut! Ferme!»
«… mmm… permm ché? Non ti piace?»
«Sêstu mate! No puoi fare questa cosa!»
«Eh?»
«Tu non sei vegana?»
«E allora?»
«A son proteine animaliii!!! Ne plui ne mancul che il lat, ancje se nol è lat di vacje!»
«Ma scherzi?»
«Eh no, io ci tengo ai princìpi. Anche se non sono i miei! Anzi… non puoi più farli a nessun altro! Se propite propite ti ven chê voe, a une rame di cocolâr! Mi dispiace, ma non si combina niente! Cun di plui a devin vê puartât la mangjative, sint ca ce profumut!» e dite cussì al tire dentri la zoie e le lasse pastanade li che e je cu la gole.
La fantate e torne dongje scunide e dute scaturide, plui che altri par chel aspiet dal veganesim che no veve mai considerât. Cuant che e va li dal buffet, za pronte a fâi cambiâ idee a Milio, lu cjate che al pare jù dut ce che al è su la guantiere des verduris, comprendût il tofu, e chel de gridele e dai formadis nancje no lu cjale.
«Ma allora anche tu sei vegano come me!» i dîs cui voi a cûr, za pronte a une gnove chance.
«Sêstu fûr? O mangji prime dute cheste porcarie ca, che tant no jemple, e cussì mi reste la cjar e il formadi, e chei ju mangji dopo cun calme».
E intant che i diseve cussì, al meteve in bocje ancje la ultime sclese di zardiniere.

di Milio dai cjans
#1499