La cunvigne

Insome, la serade di Lupo Manarie a Gjalarian no tacave mai. E jere stade anticipade di une cunvigne di filolics furlaniscj!
Cun di plui Rafaêl si jere ancje dismenteât i costums di sene!
– O crodevi di vêju lassâts tal bagai de 500 viole ma o soi vignût cu la Torpedo blu…
E chei filolics furlaniscj no fasevin altri che barufâ. Un al voleve i cartei pentalengâi intes stradis: furlan, talian, cjargnel, sloven e todesc. Chel altri i diseve che alore bisugnave montâ un telescopio su ogni machine. Un al voleve reintrodusi il celtic, une volte vêlu ricostruît su la base di ipotesis. Un altri al voleve sostituî la cedilie cu la pipe, stant che no sin in Turchie. Po un altri ancjemò al varès domandât i finanziaments par un vocabolari furlan/furlan in dîs volums cun di une bande la grafie uficiâl e di chê altre la grafie di Faggin.
Insome, di sparâsi!
E, cuant che Rafaêl al à tacât finalmentri a recitâ a braç insiemi a une femine more cui cjavei curts (probably une gnove jentrade a “Contecurte”) lis maris e i frutins a jerin scjampâts ducj! E jere restade dome une mari, une dolce madone che i dave di tete al so frutin neonât. E jere dongje di un cuatri furlaniscj barbons che a sameavin i zimui di Franz Josef.
A un ciert pont jê e disè alc ai zimui: “Il friulano non lo parlo e nemmeno lo capisco ma è forte quel tale con la barba e i capelli arruffati. Mi fa troppo ridere”.
Dopo però mi soi sveât. Al jere dome un insium. Un classic. Un dai solits insiums dai pidiments che a capitin…
Ma o soi convint che il 29 dicembar a Gjalarian la serade di Lupo Manarie e larà benon.
Reste dome une racomandazion ai contadins dal paîs: fasêt la vuardie ai vuestris pulinârs!!!

di Checo Tam
#1***

Note1: ripuartade di un insum vêr dal autôr.
Note2: Nissun furlanist al è stât maltratât par scrivi cheste conte